蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年05月27日
馬上成為壹會員

陀地擅賣祖堂地「使用權」 
2,000呎售260萬 買家無業權

【村霸騙局】
【本報訊】樓巿續破頂,上車族叫苦連天,有人卻在屋網以260萬元超筍價,出售一幅2,000呎屯門靚地。不過《蘋果》調查發現,此地在清朝光緒年間由一名原居民地主擁有,但他已去世逾一個世紀;離奇的是,有自稱其後人的「屯門陀地」,近日在網上先後放售該祖先合共五幅土地,記者以買家身份放蛇直擊其中一塊地,揭發其吹噓出售的「土地使用權」根本是騙局。有律師及立法會議員警告,「戇居居買地」隨時血本無歸。
記者:黃學潤 郭美華 李晟謙 張 軍

相關新聞:鄧氏先祖光緒年間居住 遺七地掀爭奪戰

「地一定係靚地,點解賣呢?全部都係為錢!」一名身形肥胖、自稱姓鄧(洋名Albert)的紫田村原居民,親自開車接送以買家身份睇地的記者,在西鐵兆康站出發,僅五分鐘車程便抵達。

該地位於紫田村內,面積約2,000呎,毗鄰為新落成的欣田邨,部份範圍用鐵絲網圍起。記者走進空地,發現擺放了三個貨櫃,Albert指現租予他人擺貨,其中一個貨櫃改裝成飯堂,內有桌椅、雜物等,「呢幅地我哋已用咗超過一百年,以前養雞嘅,幾年前起欣田邨時,我哋三兄弟就喺呢度做地盤工飯堂,一日賣過百個飯盒」。

「若干年後可申逆權侵佔」

Albert儼如主人翁帶記者參觀,又聲稱在欄河搭建小鐵梯,買家以後出入更方便,不用兜路,只要爬下小梯,即可抵達隔籬欣田邨,「呢度係V Zone地(鄉村式發展),你有丁權就可以起丁屋。」他還分析買地好處:「你係私人地,政府(將來收地)要賠償(畀你)。」

至於何以賤價出售筍地?Albert表現無奈:「全部都係為錢,家家有本難念的經。」他更主動解釋土地由來,「呢度係我曾祖父按咗畀佢同村嘅叔伯兄弟,叫鄧雲開。」但根據該村族譜發現,這位Albert是鄧雲開同輩的第七代後人。他表示祖先死後遺下的土地由家族成員沿用至今,但一直未轉名,「我阿爸同阿哥用咗咁多年,但好蠢,太老實,唔識申請逆權侵佔!」

為了讓買家安心,他又強調:「我哋會喺律師樓見證下,簽字頂讓(使用權)畀你,你若干年後咪申請逆權侵佔囉!」至於土地業權人並非新買家名是否無保障?Albert即安撫:「你畀咗錢,白紙黑字,唔會轉頭被反咬一啖嘅!」至於會否被人收陀地?他更拍心口稱:「梗係冇啦,陀地就係我,如果有人收陀地,你第一時間打畀我,我住附近……佢見我行出嚟都掉頭走啦!」

相關新聞:朱凱廸:勿戇居居以為執平嘢

紫田村村代表:點可以買賣?

其間見記者猶豫不決,他即擺出一副高姿態:「驚死就唔好買!我唔係個個人都賣㗎!我有啲熟人想買,但唔夠錢,我唔想畀佢分期付款。」又指自己30多年前已退休,「𠵱家只係打吓蟋蟀,跑吓馬仔,但賭好細,一日都係賭幾千蚊啫!」

不過記者發現,除了該幅2,000呎土地外,Albert一個月前已在屋網出售鄧雲開另外四幅土地,面積合共1.1萬呎,開價1,400萬元。對此Albert聲稱該逾萬呎土地已成功出售,現作貨倉用途。

事後記者向紫田村原居民村代表鄧德森了解,他直言涉事土地屬於鄧雲開:「(塊地)不嬲由我哋鄧方偉祖(即祖堂司理)接管處理。」據知,擅自賣「先人地」的Albert為鄧雲開同輩第七代後人,村長直言:「塊地都唔係你(Albert)名,點可以買賣呢?我唔清楚法律上有冇『使用權』呢樣嘢,但我哋就冇囉!」他更揚言:「呢塊地我哋自己人用就冇所謂,外面人用就有啲爭議喇!」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載