蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年04月26日
馬上成為壹會員

隔牆有耳:高佬賢冷血累街坊
工黨譚駿賢無辜「中箭」 - 李八方

佔中案判刑後,民建聯漁農界議員何俊賢極速成為網上「紅」人,皆因佢前日喺facebook發帖,冷血嘲諷公民黨陳淑莊因為腦內有腦膜瘤急需做手術而獲法庭押後至6月10日判刑,質疑Tanya要找數時就患絕症?竟然可以咁涼薄,自然被唔少人搜索,而原來呢件事令工黨屯門區議員譚駿賢無端因此被街坊質問!

試過俾人當係吳思諾老公

話說譚駿賢噚日朝早如常到屯門落區時,一位70、80歲嘅伯伯上前質問佢:「點解你講啲咁嘢呀?」指唔明白點解佢咁衰,出言詛咒患病嘅陳淑莊患絕症?起初一頭霧水嘅譚駿賢,同個伯伯傾咗幾句後,發現對方認錯咗佢係個名同自己差唔多音嘅何俊賢,嘩,咁大鑊,梗係要即場同嗰位叔叔澄清:「嗰個唔係我嚟㗎!」並力斥何俊賢咁講嘢真係好離譜。

八方問過譚駿賢,佢話自己已經唔係第一次因為個名同其他人相似而被認錯,好似早前就試過畀街坊問佢外父係咪已故立法局議員吳明欽?事源現為大律師嘅吳明欽女兒、民主黨吳思諾早前接受訪問時,講過佢老公叫做譚俊傑,即係個名同譚駿賢,只差一字,加上街坊知道譚駿賢老婆係大律師,就搞錯咗佢係吳思諾老公喎!所以譚駿賢今次再遇到類似事件時,佢都只係話感到無奈,但又唔會太憤怒,若然要嬲,都係嬲點解有人咁冷血。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載