› 選擇地區
三藩市
紐約
洛杉磯
其他美國地區
香港 台灣 北美
 
2019年04月21日

兒子判刑前齊齊整整食餐飯
黃浩銘爸爸:佢哋冇做錯

【佔中九子罪成】保釋期間的Happy Friday,黃浩銘的父親、下禾輋村非原居民村長黃裕財親自到燒臘店買燒鵝及肥叉,為當晚在黃家舉行的海鮮宴「斬料」,黃父笑稱是要「慰勞」在佔中案被判煽惑他人犯公眾妨擾和煽惑他人煽惑公眾妨擾罪成的兒子。黃父憶述4月10日隨獲保釋外出的兒子步出法庭時,「出面(庭外)掌聲響起,真係好感動」;立場由建制派「變黃」,他笑稱與「未來親家」有關,深明兒子今次只是為爭取香港更好的將而負上刑責,「佢哋(佔中九子)根本冇做錯!」
記者:林俊謙

佔中案裁決後四天,位於沙田的黃家很熱鬧,逾十位親友圍在飯桌談天說地,享用黃母的拿手小菜。這天黃浩銘如常為社會議題四處奔走:上午到法院聲援古思堯區旗案,下午走勻港九新界設街站反對修訂《逃犯條例》,忙至晚上8時半才與未婚妻回家開餐。雖然刑期或以年計,席間毫無傷感,黃浩銘不失黑色幽默:「我當然好開心(保釋兩周),因為始終可以多啲時間處理自己嘅『身後事』,多啲時間同屋企人相處」。

相關新聞:糖尿病上眼 邵家臻慶幸可保釋打針

「𠵱家(九子)要受呢個刑罰,咪去囉,咬住牙關去囉!佢冇殺人、冇放火,佢係為咗我哋香港人下一代嘅將來!」

黃裕財早前動手術後,現在健康不俗,黃浩銘稱非常感恩,但也提醒父親多做運動,「我都會多啲做運動,希望大家都有好嘅身體,就算(我)喺獄中,都唔使令我擔心。」佔中案審訊期間,黃父天天到庭旁聽,黃浩銘坦言原不想他參與太多,「嗰日一話我有罪,佢(黃父)成個人都好緊張,坐咗喺度冇乜點出聲,佢都唔係好開心,所以我唔係好想佢咁近咁同我一齊去承受我要面對嗰種挑戰,希望佢寬鬆啲去面對」。

「最想同佢食餐飯、傾吓偈。」59歲的黃裕財在兒子或要入獄前的最後時光,與記者閒話家常,「呢幾日撞到村友,佢哋都問候阿銘,我就多謝啲親友、朋友咁關懷、咁關心(兒子)」。他憶述在法院外見到巿民聲援佔中九子時,感動至「幾乎喊出嚟」;聽畢朱耀明的陳詞後,法官押後判刑,「我隔籬嗰個(佔中義工王惠芬)嚎哭緊,喊咗好耐,我遞紙巾畀佢,我都眼有淚光」。

雖然不時與兒子爭辯政治,黃裕財對佔中案看法卻與兒子相近,他認為九子只是爭取中國前領導人鄧小平曾經承諾予香港的雙普選,完全沒有做錯,「𠵱家(九子)要受呢個刑罰,咪去囉,咬住牙關去囉!佢冇殺人、冇放火,佢係為咗我哋香港人下一代嘅將來,佢今日受到刑責,我做爸爸控制唔到,我只有祝福佢,叫阿仔喺裏面鍛煉身體,自己照顧好自己,睇多啲書。」

立場由建制「變黃」,黃裕財指與未來新抱的媽媽有關,他一直希望兒子早日成家立室,眼見「未來親家」本來反對女兒與兒子交往,及後明白兒子行動意義後全力支持,令他也有改變,「所以我𠵱家冇咗以前嗰種嘆氣感覺,我𠵱家就係堅強,要堅強去支持佢」。早前已因東北案押後婚期的黃浩銘聽畢,甜絲絲的抿嘴微笑,笑容中有一種說不出的「珍重」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載