› 選擇地區
三藩市
紐約
洛杉磯
其他美國地區
香港 台灣 北美
 
2019年04月16日

隔牆有耳:
宇宙級煲冬瓜挑戰崔C安 
一哥考大家:油果踩油渣 - 李八方

澳門特首崔世安2009年宣誓就職時,將「本人崔世安」讀成「笨忍崔C安」,爛透普通話一直俾人笑到今日,而我哋香港嘅政務司司長張建宗,用普通話將「一國兩制」讀成「一國兩雞」,同樣技驚四座!估唔到佢兩個之後,再有港官普通話震驚香港人,佢就係警隊一哥盧偉聰,佢可以用普通話將「有國才有家」讀到變成「油果踩油渣」!

為讀錯字耍冧

香港政策研究所噚日朝早舉辦「全民國家安全教育日香港研討會」,舊年研討會發言嘅保安局局長李家超,今年就冇再出場,改由一哥盧偉聰發言,不過八方現場聽一哥「煲冬瓜」,唔止聽嘅時候字字驚心,直情可以睇到佢讀稿時候個樣都好吃力,睇得出佢夾硬講唔流利嘅「煲冬瓜」有幾辛苦,佢仲多次讀錯字,好似將「有國才有家」讀成「油果踩油渣」、「絕不姑息」變成「啫bu姑絲」、「果斷執法」講成「果啄止罰」,有網民仲覺得一哥讀「構成」一詞時,好似廣東話粗口諧音,而一哥似乎亦心知自己「煲冬瓜」嘅水平,一度因讀錯字喺台上講「不好意思」,引來台下人士不時失笑。

至於一哥發言講乜?其實咪又係《基本法》列明香港特區係中國不可分離部份,任何鼓吹港獨行為都違反《基本法》,港獨組織宣揚港獨、嚴重危害國家安全,港府會果斷執法取締任何港獨組織之類言論,個個講者講嘅內容差不多,出席人士聽唔聽得明一哥噏乜都分別不大。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載