蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年04月11日
馬上成為壹會員

疑似便衣警跟蹤陳淑莊
陳怒斥:侮辱緊我 騷擾我朋友

【佔中九子案】
【本報訊】佔中九子被控煽惑他人煽惑公眾妨擾等罪,前日九人被裁定罪成,法庭宣佈本月24日判刑。九子之一的公民黨陳淑莊昨上午休庭期間,她及其友人被疑似便衣警察在庭外跟蹤近一小時,她批評雖然她被定罪,但並非「走犯」,感到受辱,「我哋好似賊咁樣,你係咪要跟到我返屋企?你係咪要跟到我返立法會?你係咪要跟晒我全家?」陳的代表律師促警方澄清該人是否警員及跟蹤監視的理據。 
記者:鍾雅宜

相關新聞:九人同穿休閒鞋 免即時收監「掹鞋帶」

法庭昨繼續聽取被告陳情,上午一度休庭,九子獲准繼續保釋。陳淑莊下午步出法庭見記者時,嚴厲批評有疑似便衣警察在休庭一小時期間,無理跟蹤她及其朋友。她稱:「我哋雖然被定罪,但我哋唔係走犯……佢係侮辱緊我,亦都騷擾緊我嘅朋友……我哋好似賊咁樣,你係咪要跟到我返屋企?你係咪要跟到我返立法會?你係咪要跟晒我全家?香港係咪𠵱家變到咁樣?」她直言不能接受,嚴正警告警方,「邊個落order(命令)?落埋啲咁嘅指令!𠵱家警察好得閒呀?如果警察跟人跟到咁豆泥嘅話,我覺得好失禮!」

無戴證件 法庭跟至座駕

陳淑莊代表律師陳惠源指,當時陳淑莊休庭後返回其座駕,其間一名黑衣男子一直從法庭跟隨她至座駕,無佩戴任何證件。陳淑莊在車上逗留大半小時,對方一直在附近監視,又跟隨她返回法庭。當她抵達庭外時,現場三名男便衣警員欲上前與該黑衣男打招呼,「但個男人好似扮唔識佢哋咁」。其後陳再看到該黑衣男與三名便衣警聊天,並一直站在一起,故陳惠源相信該黑衣男亦是警員。陳惠源指陳淑莊出庭期間,亦有疑人走近陳的座駕,「喺度唔知睇啲乜,都唔知係啲乜人」。

陳惠源批評:「究竟呢個動作係咪警務處長指示?有乜目的?點解要咁做?根據啲乜法律可以咁做?」陳惠源亦指若此行動並非上級指示,「佢點解要咁做?警務處嘅立場係點?會唔會調查?」陳惠源稱若此人並非警員,警方更應跟進,並公開澄清,「呢啲鼠輩行為,對警方係好侮辱……台灣件案,你又跟到咁足;香港呢啲案,你又跟唔跟?」

九子之一的立法會議員邵家臻指未有留意是否有人跟蹤他,但他認為此舉不可接受,「我哋係公眾人物,你要搵一定搵到我,點解要咁?根本多此一舉,別有用心」。黃浩銘未察覺自己受警方監視,稱即使對方作出監視行為亦不會懼怕。

相關新聞:公眾妨擾曾判緩刑案例難引用

國際特赦組織促警方交代

國際特赦組織香港分會策劃幹事陳曉程指,警方應盡快交代涉事男子的身份是否警員,如屬警員,需交代跟蹤或監視的理據,「警方應該保護市民嘅人身安全,而唔應該令佢哋覺得受到威嚇」,她稱,佔中九子雖然已被判罪,但亦獲法庭批准保釋,警方沒有必要作出監視等行為。

警方回應稱,因應西九龍法院大樓的情況,警方為保障公眾安全,調派適當人手(包括軍裝、便裝及機動部隊人員)在法院一帶的公眾地方作人群控制及交通管理,以維持公眾秩序及避免出現混亂情況,其間並無派遣警員跟隨任何人士或作出任何截停盤問。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載