› 選擇地區
三藩市
紐約
洛杉磯
其他美國地區
香港 台灣 北美
 
2019年04月10日

「勿以為捉晒公雞,晨曦就唔會來臨」

陳淑莊庭外發言時一度哽咽。

【本報訊】各被告昨面對判決前並無畏懼,更激勵香港人決不可灰心放棄。各人希望港人繼續抗爭,昨日的判決不是終點,而是另一個開始,又指爭取民主的道路雖漫長,「唔好以為捉晒啲公雞,晨曦就唔會來臨」,只要人心不死,民主的晨曦終露曙光。

相關新聞:大狀:他們的行為已是服務社會三子不欲法庭判社服令

陳淑莊哽咽:為我哋嘅家爭取

九名被告昨晨聽取判決前在法院外集會。除學聯前常任秘書鍾耀華表示無話要說,各人都輪流發言。最先發言的三子聲言絕不退縮,戴耀廷指:「今日無論結果係點樣,我相信同我一齊好多朋友,我哋會繼續堅持落去,爭取香港民主。」陳健民稱,判刑雖然將有深遠影響,「我仍然相信愛與和平嘅力量,我對於我做嘅事係無怨無悔」。朱耀明亦指:「無論結果點樣,唔應該灰心,唔應該放棄,希望屬於爭取嘅人。」

自言「眼淺」的立法會議員陳淑莊發言時一度哽咽,她指母親不會到庭旁聽,所以特意穿了和母親在日本旅行時一起購買的連身裙,「我媽咪係一個唔識政治嘅人,但係佢從來冇質疑我做嘅嘢」。她又寄望港人「為我哋嘅家」繼續爭取應得的權利。「生於斯,長於斯,能夠以唔同崗位為我嘅家服務,係我一生嘅榮幸,我所得到嘅,一生受用,我所失去嘅,不值一提。」

另一議員邵家臻亦一度哽咽,他忠告港人:「千祈唔好習慣黑暗,更加唔好因為習慣黑暗,為黑暗辯解,更加更加唔可以因為習慣黑暗而嘲笑追求光明嘅人。」他警告政府:「唔好諗住捉晒啲公雞,困住啲公雞,或者殺晒啲公雞,晨曦就唔會來臨,晨曦必定會來臨。」

學聯前常委張秀賢則坦然面對:「千祈唔好再話,我哋九個係代香港人坐監,或者代佔領者坐監,我哋行咗公民抗命呢一步,所有嘢都係自己決定,最緊要係自己承擔。」他呼籲港人不要因無力感放棄:「去繼續走我哋未行完嘅路,今日絕對唔係一個終點,今日係另一個起點。」又以國語向台灣人說:「以香港為例子,大家去抗爭,捍衞自己的價值,現在香港與台灣前路都艱難,一起努力走下去。」

社民連黃浩銘則提醒各人,內地有多名聲援傘運人士被監禁,「佢哋承受嘅係更加多,唔好以為我哋付出咗好多,我哋仲有漫漫長路,唔好因為九子嘅監禁失望同灰心,希望在於人民,改變始於抗爭」。民主黨李永達對未來仍有信心:「香港民主運動進行咗三四十年,我哋暫時未有成果,但我永遠相信總之香港人心不死,民主係會嚟到,我更加相信獨裁政權係唔可能千秋萬世。」
■記者麥志榮

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載