› 選擇地區
三藩市
紐約
洛杉磯
其他美國地區
香港 台灣 北美
 
2019年04月03日

隔牆有耳:東方昇、杜汶澤
眾籌登廣告問候689 - 李八方

前特首689最近喺fb頻頻證明自己係《蘋果日報》嘅忠實讀者,日日影低邊啲公司喺《蘋果》落廣告,向廣告商施壓;但睇嚟越壓越多人關注廣告內容,變相為廣告二度宣傳,曲線幫廣告商,689果然「用心良苦」,更加估唔到引起一班KOL關注,一齊加入由689掀起嘅《蘋果》廣告熱!

社民連主席吳文遠話689既然咁沉迷《蘋果》有乜廣告,建議大家不如夾錢買全版廣告「問候」689;毛記電視主持東方昇英雄所見略同,喺fb話近幾日佢最「欽敬」嘅689每日都留意住《蘋果》,喺fb度公佈有乜人喺報紙買咗全版廣告,忽發奇想話:「如果我搞眾籌,喺蘋果買全版廣告,夾錢嘅人就可以留句說話畀佢,保證佢一定睇到,你哋話有冇得諗呢?」呢個建議出街一粒鐘,已獲逾1,500個like同逾300個留言力撐。

日前杜汶澤亦喺fb寸689冇做特首後「退而不廢」,建議壹傳媒參與「廢老就業計劃」,邀請689任「分類X廣告」主任,佢都力撐東方昇建議:「你(東方昇)搞,我幫你去攞Discount(折扣)!」

網民:幾十萬人訂閱你點施壓

吳文遠其後亦喺fb跟進,話由於689轉載《蘋果》廣告行為有升級趨勢,恐防佢放棄治療,發起一人一百蚊,眾籌三萬蚊以便喺《蘋果》內版登「問候梁振英」廣告。唔少網民亦加入行動,有人建議夾錢喺《蘋果》落全版廣告,大大隻字鬧689,睇佢登唔登。亦有網民話689想向廣告商施壓咩?咁咪登記訂閱《蘋果》,到時幾十萬人訂,睇你689點向幾十萬人施壓!八方真係要向689講句「多謝先」。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載