› 選擇地區
三藩市
紐約
洛杉磯
其他美國地區
香港 台灣 北美
 
2019年03月21日

隔牆有耳:見完記者 衫都唔換
OK Ma飛上海打Golf - 李八方

噚日承諾會就列車相撞意外查明真相嘅馬時亨,轉頭被讀者發現飛抵上海疑似準備打golf。

你有你忙碌,我有我享受?港鐵主席馬時亨噚日喺在中環站公開承諾會就列車相撞意外「查到水落石出」,但轉過頭俾市民見到,佢已急急腳趕住坐飛機去上海,而且懷疑佢唔係去公幹,而係去打高爾夫球。有市民向八方爆料,話馬時亨見完記者,連衫都唔換,就趕去機場搭上午10點起飛嘅港龍客機前往上海虹橋機場,港人黃先生話馬時亨唔似為公務,似係去打高爾夫球,黃先生同部份乘客都質疑,港鐵上下正全力為列車相撞意外善後及作深入調查,馬主席仲有時間去上海打波,好似有少少不負責任。

市民︰冇心做不如退位

八方將馬時亨噚日喺中環站講話照片,同黃先生拍下嘅相比對,發現兩幅相相中人外貌同衣着都一樣,黃先生話佢同其他乘客,都清楚睇見馬主席喺行李輸送帶上,拿走一個高爾夫球袋,所以佢信馬主席去上海唔係公幹,而係打高爾夫球散心,可惜因為內地禁區嚴禁拍照,所以影唔到馬主席拎高爾夫球袋,黃先生之後喺禁區外再等馬主席,想影佢拎高爾夫球袋嘅相,點知馬主席行出禁區時,手推車上只有普通行李,高球袋已離奇地不知所終,黃先生估計可能有其他人已代佢拎走咗。

黃先生覺得馬主席呢個時候去打高爾夫球不太妥當,因為處理港鐵意外遠比其他嘢重要,又話馬主席如果冇心做,不如退位讓賢,唔好霸住個地盤唔做嘢。港鐵發言人唔回應馬主席係咪休假、係咪去上海,只係話馬時亨係港鐵非執行主席,佢私人問題包括是否休假往上海,港鐵不便代為回應。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載