› 選擇地區
三藩市
紐約
洛杉磯
其他美國地區
香港 台灣 北美
 
2019年03月15日

隔牆有耳:57歲「台灣女孩」唔認有綠卡 - 李八方

自稱係台籍港區(政協)委員嘅前中央政策組高級研究主任凌友詩真係日日有新聞,繼日前台灣政府話會研究取消佢台灣嘅戶籍,噚日又有台灣媒體爆料話佢有美國綠卡,又有內地網民明讚實踩佢,仲有分析話中共搵佢發言,原本想唱好習近平對台政策,點知出嚟變反效果,都唔知係咪想跣習。

話淨係去過美國兩次

台灣有網媒爆料話凌友詩呢個「台灣女孩」,表面就對中共效忠撐習兩岸統一,但實際上佢手握張美國綠卡,根本係半個美國人,有台灣網民即刻群起拎嚟玩,有人話「原來是有綠卡,要送台灣人去死」、又有人揶揄:「又是個美國人在叫大家當中國人。」台灣網民唔放過佢,大陸網民一樣對佢唔客氣,有人話佢成57歲,竟然仲係「台灣女孩」!有人唔知真心定假意讚佢「朗誦技巧出眾!」仲有人話佢表情同聲線似足北韓電視台嘅大媽主播!

《蘋果》搵到凌友詩回應網上話佢有美國綠卡的傳言,佢話完全係亂講,佢冇美國居留權、冇世界上其他國家居留權,只有香港永久居民身份同台灣戶籍,而佢只去過美國旅遊兩次,每次都大概只有一個星期,又話睇佢本科同兩個碩士喺中文大學,然後喺香港結婚生仔、博士又喺香港大學讀,根本冇喺美國居留過。佢接受台灣中央社訪問,仲話就算取消佢台灣戶籍對佢都冇影響。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載