› 選擇地區
三藩市
紐約
洛杉磯
其他美國地區
香港 台灣 北美
 
2019年03月06日

隔牆有耳:錯字唔知 掛起唔發覺
民建聯盲撐「開日大嶼」 - 李八方

工黨趙恩來影低民建聯落力撐「開日大嶼」嘅相放上網。

被指要動用一萬億元嘅填海工程「明日大嶼」,建制派梗係要全力撐啦,不過撐都唔可以撐得咁肉酸,否則就會變豬隊友,為特首林鄭月娥幫倒忙,八方講緊邊個?咪就係成日越幫越忙嘅民建聯囉!噚日嘅嘅荃灣區議會特別會議,由民建聯陳恒鑌動議撐明日大嶼,會前佢哋動員自己友去請願,當然要大堆頭影張相交功課俾人睇。成隊人喺場外拉出兩條「儘快展開『開日大嶼』相關研究」嘅橫額。乜鬼嘢嚟㗎?乜唔係撐「明日大嶼」咩?點解變「開日大嶼」?!

「保皇黨都係文盲」

不過最豬嘅並唔係將明日大嶼變開日大嶼,而係民建聯攤開咗橫額都仲未知衰,掛埋出嚟都唔覺有錯嗰下好嘢。其實,錯其他字都還可以,「明日大嶼」幾粒字都可以寫錯,究竟係咪真心撐嘅先?

喺現場嘅工黨趙恩來、夏希諾同埋民主黨盧俊宇就影埋相公告天下,佢哋都不禁大嘆「保皇黨都係文盲,咩叫『開日大嶼』?」、「民建聯帶錯橫額去示威?!」、「原來除咗『明日大嶼』計劃,還有『開日大嶼』計劃!」 聽聞民建聯為咗搞呢個動議,用咗條荃灣區議會從來冇用過嘅會議常規,開呢個特別大會,前後不足十個工作天通知期。咁心急,難怪字都寫錯啦!

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載