› 選擇地區
三藩市
紐約
洛杉磯
其他美國地區
香港 台灣 北美
 
2019年02月20日

隔牆有耳:中聯辦大堂掛《良宵》真迹值近千萬 - 李八方

中聯辦噚日搞新春午宴,請晒全體立法會議員出席,不過即使西環出乜嘢招數游說,民主派一於睬你都儍,全部缺席杯葛。雖然民主派唔中西環計,但場午宴點都要食,而且點都要扮開放透明,所以即使唔畀返大陸採訪嘅《蘋果》記者,西環今次都放行入大堂採訪,而且做足公關工夫,除咗喺大堂準備花生、乾果、三文治仲有奶茶、咖啡畀記者外,仲向全場傳媒派每封50港元嘅利是。

不過八方最留意嘅,反而係中聯辨大堂掛嘅油畫《良宵》。呢幅畫大有來頭,由專畫中共歷史題材嘅畫家劉宇一畫,主角係中共已故領導人毛澤東,翻查資料1993年賣嘅時候,由前全國人大常委曾憲梓以836萬元投得,仲創下當代華人藝術家油畫拍賣最高成交價紀錄!不過作為愛國愛港表現,呢筆錢對曾憲梓嚟講又算得乜?八方奇怪嘅係,西環呢幅《良宵》係咪真迹?係咪曾憲梓投到後轉送西環?定係只係複製品呢?如果係真迹,呢幅畫𠵱家恐怕比1993年更值錢,因更多愛國愛港富豪一定爭住買。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載