› 選擇地區
三藩市
紐約
洛杉磯
其他美國地區
香港 台灣 北美
 
2019年02月20日

隔牆有耳:羅致光包拗頸
「性格嘅嘢好難改」 - 李八方

娥特面對民望急挫公開話要反思,最近仲提點司局長要善待傳媒,勞工及福利局局長羅致光(CK)就率先響應老細建議,噚日安排同傳媒午宴。

承認蔡子強批評得啱

席間講到自己民望因綜援風波大跌21個百分點,CK都大方回應話當初都估計民望會受挫,但話自己都唔係視民望如浮雲嘅官員,心水清嘅佢話官員民望若不太差,市民會較易以正面角度看待相關政策。

CK仲話綜觀咁多批評,以中大政治與行政學系高級講師蔡子強話佢好辯失分講得最啱,自爆細細個已經俾人話佢招積,因為好辯所有問題來者不拒,乜都拗一餐,但佢又自知議事堂上同議員辯論會輸蝕,但講到點改進,CK聳聳肩話性格嘅嘢有時唔容易改變。

CK咁氣定神閒,可能因為佢一早算到下一步,點解咁講?原來CK都熟悉風水命理,會睇掌睇相,仲話細細個已經算到自己會入官場,但係有次睇睇吓掌有人話現場女士着得咁密實睇唔到「事業線」,佢竟然聽唔明,仲心諗人哋都冇戴手套點會睇唔到。

CK智商高人人都知,但原來會游渡海泳嘅佢自細身體好差,腸胃同氣管都唔好,出身小康之家嘅佢試過大病時,嚇到馬姐抱住佢喊晒口叫:「光仔唔好死啊光仔!」大個咗又試過揸揸吓車突然急性炎腸炎,要同做婦產科醫生嘅大哥臨時約定喺街邊「就車解決」,即場除褲打針。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載