蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年02月12日
馬上成為壹會員

隔牆有耳:「不應鼓吹同學談戀愛」
邱比特活動 明愛棒打 - 李八方

喺現今嘅香港,唔少年輕人中學已開始拍拖,更加唔使講大專生、大學生,但竟然仲有大專院校禁止校內舉辦情人節活動,話有鼓吹同學談戀愛嘅意思,真係令八方有重回上世紀六七十年代嘅感覺。

話說「明愛專上學院及明愛白英奇專業學校聯合學生會」早前喺facebook公佈,原擬喺後日(14日)情人節之前,舉辦名為「明愛邱比特」系列活動,包括「匿名配對」,成功配對嘅學生可以玩「定情信物」,「定情信物」其實亦只係去學生會攝影站,同成功配對嘅同學影張相。

網民︰降格做幼稚園算啦

其實成個活動睇來睇去都冇乜出位犯禁之處,但噚日學生會引述校方話,「邱比特」三字同「匿名配對」有鼓吹同學談戀愛意思,俾校外教友知道「會向學校投訴,影響學校聲譽」,所以學生事務處唔批,要取消活動。

呢單嘢爆出後,好多網民不滿校方咁專制,有網民更嘲笑不如「降格做幼稚園算啦」。校方回應就話,學生會至今尚未就有關活動完成提交申請。據了解,學生會冇向學生事務處提供完備的活動內容和足夠的資料,亦未就有關活動填寫同遞交申請表,所以學生事務處無法按既定程序作出跟進喎。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載