› 選擇地區
三藩市
紐約
洛杉磯
其他美國地區
香港 台灣 北美
 
2019年02月11日

隔牆有耳:有一種溫柔 
叫貪新不忘舊 鄺俊宇 - 李八方

恭喜發財,豬事大吉。久聞樓梯響嘅《動物保護法》,盛傳今年有眉目,八方都搵嚟各界人士同寵物寶貝亮相,齊齊同讀者見面。首集邀請鄺俊宇打頭炮,同佢嘅狗女啤啤去公園玩。咪住,乜鄺神唔係貓奴嚟㗎咩,莫非佢變咗心,貪新忘舊,數到豬年,就放手?

實測人狗共享公園

「佢係啤啤,一歲大,女仔嚟㗎」。邀約鄺神去元朗宏業南街休憩公園,離遠已經見到佢拉拉扯扯,新女啤啤好興奮咁四圍衝,似乎呢位愛情專家未有計仔俘虜到啤啤嘅心。松鼠狗啤啤同媽咪及細佬原本喺繁殖場生活,鄺神話機緣巧合下「救」咗佢哋出嚟,幫佢哋搵咗頭好住家,自己亦係半個主人,一得閒就帶佢哋跑步行山,「訪問前幾日就行咗6.7K。」

本身養貓十幾年,鄺神講起「咪咪」就喜上眉梢,分享同床共寢情事,「有時唔小心會一腳踢佢落床,佢又會跳番上嚟」,「佢好記仇㗎喎,踢到佢又會咬我」。聽落好有打情罵俏feel,但咪以為鄺神因新歡而忘舊,既然係試用有份成功爭取嘅人狗共享公園,當然同啤啤結伴登場比帶咪咪出嚟較適合,「佢(啤啤)坐唔定㗎,又以為自己係獵犬。」訪問期間有大狗經過,身形細小嘅啤啤不停狂吠,鄺神冇佢符,不停安撫,「乖乖哋,完咗請你食雞條」,呢一種溫柔,男女世界都少見。

獲封貓議員,梗有過人之處,2007年任區議員嘅首個動議就係關於動物權益,「當時有個警方代表喺會上好不屑,話呢啲交畀『貓議員』處理」,10年過去,貓議員入咗立法會都毋忘初衷,首個議員議案就係提出《動物保護法》,最終獲通過。

寵物行公園,點解要偷偷摸摸?鄺神帶啤啤去公園都試過俾保安趕,但以後去宏業南街休憩公園就可以堂堂正正,皆因係全港六個人狗共享公園之一,雖則鄺神形容「百無」:無閘機、無水機、無寵物便溺設施,「但總算光明正大咁走入嚟」,實測下有啲配套可以做好啲,「例如地下坑渠蓋有罅位,狗仔跳得唔高就好易揳咗隻腳落去」。佢去年10月中曾向政府建議將荒廢近18年、佔地25公頃嘅葵涌公園改為全港最大型嘅寵物公園,早前獲邀視察,唔知係咪會陸續報喜?

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載