› 選擇地區
三藩市
紐約
洛杉磯
其他美國地區
香港 台灣 北美
 
2019年01月29日

隔牆有耳:支聯會「六四30」年宵檔
限量積木 重現王維林擋坦克 - 李八方

「坦克人」膠積木組合重現1989年6月5日清晨王維林擋坦克場景,限量200套。

維園年宵將於明日開始,一如以往支聯會會喺維園年宵1號同2號攤位、即係近港鐵天后站興發街入口擺檔,今年係六四事件30周年,而新六四紀念館亦即將重開,今年支聯會特別為六四30周年悼念,製作以「人民不會忘記」紀念品,將於年宵攤位出售。

今次支聯會「人民不會忘記」主題紀念品,包括黑白二色T恤同電話卡套,仲有兩款以八九民運相片設計嘅運動毛巾。但最特別仲係一套全新設計嘅「坦克人」膠積木組合,支聯會副主席蔡耀昌同八方講,呢套積木組合係要重現1989年6月5日清晨,王維林擋坦克嘅場景,呢一幕曾經出現喺全球各大傳媒,至今仲係好多人無法忘記嘅一幕。蔡耀昌話呢套膠積木組合只造咗200套,每套300元,賣晒就冇。

尊子揮毫為紀念館籌經費

除咗有「人民不會忘記」主題紀念品今年支聯會仲搵咗政治漫畫家尊子同立法會議員葉建源到場為市民畫肖像同寫揮春,一方面替六四紀念館籌募經費,亦祝願民主中國早日實現。

講開新嘅六四紀念館,蔡耀昌話將於今個月底收樓,隨即開始裝修,希望可以喺今年4月正式開幕,由於新館買入價800萬元,加埋印花稅裝修等開支,重建新館相信要使成920萬元,先前賣咗舊六四館之後,有關賬目大約620萬元左右,即係支聯會仲要籌措300萬左右,所以蔡耀昌希望市民喺年宵可以多支持支聯會年宵籌款,令新六四紀念館可以應付各項財政開支。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載