蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月11日
馬上成為壹會員

隔牆有耳:建議引入野豬天敵
劉業強延續豬狼之爭 - 李八方

好快就到豬年,可惜唔係人人都愛豬。身兼行會成員、鄉議局主席嘅經民聯劉業強,收到好多市民反映野豬橫行嘅問題,於是佢趁答問大會當面質詢娥特,會唔會畀野豬狩獵隊復出,或者用啲另類方法,引入野豬天敵?八方聽完真係呆一呆,引入野豬天敵即係引入狼,而「狼」又令八方諗起一個人。

劉業強話佢部電話就有十幾條野豬出沒嘅片,例如有小朋友被野豬撞親,可見野豬問題相當嚴重。娥特都表示認同佢嘅說話,話啲野豬聯群結隊四圍行又唔驚人,所以佢已經叫咗漁護署全面檢視,希望署方搵到整套嘅解決方案,又叫市民記得唔好行近,又或者餵野豬食嘢。

隨時「放虎歸山」

不過劉業強聽完娥特咁講似乎唔多收貨,單刀直入問娥特,現時用緊避孕放回計劃明顯唔work,不如畀狩獵隊復出,或者引入野豬天敵啦。娥特聽完只係話會搵專家研究。八方即刻上網搵過,野豬天敵包括老虎同埋狼,若果真係實行劉業強嘅建議,名副其實係引狼入室或者放虎歸山,怕且到時野豬經已唔係問題。至於搵「狼」嚟治「豬」,八方就諗起幾年前嗰次特首選舉,唔知劉業強係咪話中有話呢?

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載