› 選擇地區
三藩市
紐約
洛杉磯
其他美國地區
香港 台灣 北美
 
2019年01月09日

爆相爆片:水管爆 馬路陷 途人變水行俠

噚日朝早10點幾,荃灣關門口街人稱熊貓酒店嘅悅來酒店對開,有一條地底水管突然爆咗,湧晒啲黃泥水上馬路同行人路,有車輛啱啱轉彎駛到嚟都要慢慢行,途人都行埋一邊避開黃泥水,但部份人被迫要澗水行。地底大量泥土沖散咗,導致路陷,面積大約三米乘三米。

警方接報到場封鎖受影響路段,即係悅來酒店對開關門口街往楊屋道方向全線,行經嗰段路嘅巴士線要改行第二度,交通警喺現場幫手指揮交通。警方同時通知水務署派人閂水掣同埋到場搶修。冇幾耐水務署嘅工人已經到場清理沙泥,現場有一部挖泥機同吊臂斗車幫手。

水務署發言人話有一條10吋直徑嘅地底食水管爆裂,署方人員已經即時閂水掣同埋做緊急維修,事件冇影響食水供應,預計維修工作今朝早會完成。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載