› 選擇地區
三藩市
紐約
洛杉磯
其他美國地區
香港 台灣 北美
 
2019年01月03日

爆相爆片:的士司機當交通燈冇到
婆婆慘遭撞飛兩米

小記由細到大,都知道要等交通燈「綠公仔」先可以過馬路,但唔好以為咁就百分百安全,因為遇到啲唔帶眼嘅司機,一樣有可能發生意外,隨時有生命危險!好似噚日凌晨,牛頭角就有位失魂的士司機,當盞交通燈冇到,撞到一位過馬路嘅婆婆彈起,盆骨重創。

由讀者譚先生提供嘅行車紀錄片段見到,凌晨近1點,佢駛到去牛頭角道玉蓮臺對開燈位,交通燈明明轉咗紅燈(行人過路燈係綠公仔),佢就停低咗,而對面線一位婆婆正橫過馬路;呢個時候,對面線一架的士高速駛至,完全冇打算停車就撞向嗰位婆婆!婆婆被撞到彈起、再跌落兩米以外嘅地面,的士司機呢刻先如夢初醒將車煞停。

「司機瞌緊眼瞓!」

譚先生話,意外後約3至4分鐘就有警員到場,為女傷者急救,「當時行人綠燈冇幾耐,其他人都係喺後面等過馬路,的士冇收掣,嘭一聲,就見到的士撞倒女途人」。目睹事發經過,譚先生坦言嚇到呆咗,「因為係(行人)綠公仔,完全冇諗到的士衝埋嚟,後面啲人即刻退後,我估個士司機瞌緊眼瞓!」譚先生形容,被撞倒嘅婆婆瞓咗喺地上郁都唔郁,由於事出突然,途人一時之間都嚟唔切反應。

被撞嘅婆婆姓黃,72歲,事後由救護車送往聯合醫院,佢盆骨受傷,經治理後情況穩定;涉事姓龍嘅66歲的士司機喺現場接受警方調查,並通過酒精呼氣測試。

其實現場附近過去都發生過奪命車禍,2016年8月,一名19歲學生哥棄用行人過路線,喺港鐵牛頭角站對開橫過馬路,其間被七人車撞爆頭,當場死亡,估唔到今次婆婆跟足交通規則過馬路,一樣出事!

爆相爆片

爆相畀$500、爆片送$1,000嘅基本獎賞外,仲會選出每周之星,每星期最高單日總點擊頭5名即刻科水$10,000,而每月15號至翌月14號期間獲得全月最高單日總點擊者,更可以成為每月盟主,額外獎賞$100,000,係$100,000!爆相爆片必須為本報獨家採用,一經刊登立即有獎!

爆相爆片WhatsApp:6383 6568

參加細則

1.爆相爆片必須由參加者拍攝。
2.若本報發現任何造假情況,將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利,如有任何爭議,以本報決定為準。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載