› 選擇地區
三藩市
紐約
洛杉磯
其他美國地區
香港 台灣 北美
 
2018年12月16日

打官司傾家蕩產 被告七旬母做清潔
家屬盼眾籌律師費申冤

【四港人菲國判終身】
【本報訊】四名港人疑遭插贓於菲律賓捲入毒案,被判藏毒罪成判終身監禁,身陷冤獄。涉案梁樹福的女兒梁詠琳與同案被告盧榮輝的胞姐盧樹好感到憤怒,過去兩年奔波兩地搜集證據,「有晒片有晒人證,證明搜個袋時冇毒品,律師都話有百分百機會無罪釋放。我哋仲帶晒衫準備接佢哋返香港,結果係恐怖成咁,完全得唔到公平審訊」。四家人都認為除非獲特首及中央出手,確保在公平情況下審訊,否則家人餘生只能屈死異鄉。而七旬盧母做清潔工幫補律師費,盼眾籌應付訴訟。
記者︰鄭啟源

涉案盧榮輝、梁樹福、陳國棟及郭錦華,前年7月在蘇碧灣對開一艘漁船被捕,被控藏毒及製毒,最終藏毒罪成,被判囚終身及罰款。盧樹好記得兩年多前,接到弟弟出事後打出的第一個電話,就是叮囑家人找律師,「佢好肯定講佢冇做過,以為法律可以還佢清白,可惜嗰度嘅司法竟然可以亂到咁」。

相關新聞:林鄭︰不能直接干預菲司法

指特首不出手 勢客死異鄉

梁詠琳說,當地辯護律師本來信心十足,四個家庭已準備好衣物,接被扣押逾兩年的家人返港,說着她淚水不斷落下,「出發前同爺爺嫲嫲講好,話今次我會帶爸爸返嚟,仲同佢哋講,叫佢哋去碼頭接我哋」。

梁說,四家人幾經波折才找到執法人員搜證時未有發現毒品的新聞片段,並請求在場記者做證人,足以證明四人的隨身物品中根本無毒品,「法官唔考慮呢樣係咪疑點,一句話唔信,仲要我哋去提出警察插贓證據,冇諗過會有咁嘅結果」。

按當地司法程序,四人可上訴或在五個月內於原訟地方法院要求重審,司法程序最快要兩年,意味他們最少要多坐兩年冤獄。盧樹好坦言已失去信心,「我細佬聽到判決後講,如果得唔到更高層次嘅介入,特首同中央都唔幫,佢哋就真係死得,唔會得到公平審訊嘅機會」。

盧樹好說,船員赴外地為船主駕駛漁船情況並非罕見,對方合共給10餘萬酬勞予全船船員,金額也並非特別高,「完全冇諗過係個局」。她形容弟弟榮輝生性怕事,絕對無膽運毒。為弟弟找證據時,更深信事有蹊蹺,「佢哋收到通知可以開船,諗住睇吓隻船行唔行到,一上船就俾人用四支槍指住,搜袋由冇嘢變有嘢,越聽就越覺得係個局」。

梁詠琳說,四人聞判後幾近崩潰,「爸爸直頭話唔想使屋企冤枉錢,反正都要屈死異鄉終身監禁,話想快啲死咗去」。詠琳說,在港的所有家人已幾乎傾盡所有籌募律師費,「我將學費拎晒出嚟,唔讀書都要救爸爸;爺爺嫲嫲嘅棺材本、爸爸嘅兄弟姊妹退休養老嘅積蓄都拎晒出嚟」。而盧樹好說,盧家在兩年多的原訟階段,為弟弟支付40萬律師費,「已經又賒又借,72歲嘅媽媽都要再做嘢,去碼頭做清潔希望幫補律師費」。

盧樹好續稱,四家人都是基層,經濟能力不足以跟菲國司法制度周旋,無法營救家人,呼籲公眾繼續關心事件,支持身陷冤獄的港人。他們或需於短期發動眾籌應付訴訟,期望熱心人提供協助。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載