› 選擇地區
三藩市
紐約
洛杉磯
其他美國地區
香港 台灣 北美
 
2018年12月15日

港故事:男女老幼愛線面 
31歲仔「線」出一片天

護膚技術日新月異,激光、彩光、微針等科技,讓剝殼雞蛋般吹彈得破的膚質唾手可得。然而,在科技不發達的年代,古法線面只需一條棉線,便可達至脫毛及收毛孔的效果,而且成本低廉。時至今日,從事美容不再是女士專利,年僅31歲的梁成坤,子承母業,拾起棉線延續線面這傳統美容手藝。

相關新聞:港故事:古時女子出嫁必「線」求好運

梁成坤(Jack)咬着棉線,隨即手起線落,「首先夾起頭髮,將海棠粉搽上臉,可以吸收油脂,亦令毛髮更明顯」。線面從額頭開始,接着到兩頰,再到最痛的眼下及唇邊,年僅31歲的Jack,外表清秀,皮膚光滑,沒有毛孔粗大的男性通病,這當歸功於其母,從小為他線面之故。

不乏外籍客

「佢哋毛多,通常脫完一個部位就頂唔順,要分開幾次。」

雖然年紀尚輕,Jack已有近廿年的線面經驗,梁媽媽何瑞鈿年輕時已於家鄉新會從事剪髮及線面,廿多年前來港於西營盤開店繼續老本行,惟久站工作令其健康日差,「周身都痛,日日收工都要佢哋幫我按摩先食到飯!」Jack三姊弟從小獨立懂事,不忍母親辛勞,胞姊於11歲便落舖幫忙,Jack跟胞弟亦於12、13歲時加入,梁媽媽怕兒子砸招牌,趁兩兒暑假時,把他們帶回鄉間,為人免費服務,「我記得嗰陣多人到打晒蛇餅,又熱又冇冷氣,有個男客人線到暈暈哋,好似中暑!」實習過後,Jack兩兄弟回店幫忙,過年前的生意高峯期,更做至手指頭爆開,「以前淨係識用死力,扯實條線,貼膠布做唔到㗎,頂硬上囉!」說罷,母子倆笑得開懷,過去的辛酸化作今天趣談。

梁爸爸是香港人,為方便照料,三姊弟兒時隨母在內地生活,由於梁媽媽忙於搵食餬口,子女從小便撐起家中大小事,「家務一定要做啦!細個同細佬一齊劏魚,唔夠力,將條魚撻落地下再慢慢鋸!」不覺得童年生活被犧牲嗎?「唔覺,媽咪仲辛苦啦!」

過去,Jack從沒想過全職當線面師傅,梁媽媽亦期望子女多讀書,從事較舒服的工作,2009年,Jack遠赴瑞士修讀酒店管理課程,家中需為他支付百萬元學費及生活費,負擔沉重,Jack決定自行賺取生活費,首選當然是線面這強項,「第一個試嘅同學仔係巴西人,佢之後冇再做,哈哈!」具有生意頭腦的Jack,提出首次免費試做,第二次開始收取每次五鎊(約50港元),極受華人同學歡迎,「就算之後大家分開咗打工,喺附近嘅話都會嚟搵我線面」。

2013年,Jack回港後從事市場推廣,下班後亦會返店幫忙,亦為店開設facebook專頁,吸納更多年輕顧客,兩年後正式回巢,「客源係好珍貴,屋企本身有咁多客源,就咁放棄好浪費」,目前店子由梁媽媽、長女燕珊、女婿阿樂及Jack共四人擔起,幼子於銀行工作,梁爸爸則負責接受電話預約,「個個打嚟都話『得啦!上嚟啦!』明明舖頭都坐滿晒人,班細路咪嘈囉!」學精了,繁忙時間梁爸爸乾脆不接電話。如今,三位年輕人已儲落一班支持者,梁媽媽絲毫沒吃醋,「講明唔搵梁太,搵佢哋,佢哋細力啲喎!」

從事線面30多年的梁媽媽,崇尚天然,對激光、彩光等美容科技敬而遠之,「唔使錢我都唔會做,點解要做傷害皮膚嘅嘢?」光顧梁媽媽最低消費80元,線面收費160元,最貴的脫腳毛則650元。店子目前七成客人是年輕人,當中三成是男性,來線面及線鬚,「線咗唔使成日剃,唔會一面鬚根」。客人中亦不乏外籍人士,「佢哋毛多,通常脫完一個部位就頂唔順,要分開幾次」。

有傳承必要

「以前啲人問我屋企做乜,線面?食得㗎?𠵱家個個都識。」

訪問期間,梁媽媽多次重複「要用心」,只因她多次目睹客人遭「不用心」對待,「做完好似冇做過咁」,梁媽媽強調,線面必須用柔軟棉麻線,若是一般縫紉用的紗線或蠟線,鋒利表面會將皮膚刮損,惟坊間不少美容院為節省成本亦會使用。她認為,線面師必須極具耐性,曾經有面毛多的顧客,花了近兩小時才完成,是一般顧客的一倍多,「毛多再加皮膚冇彈性,呢啲最難脫,特別痛,做吓停吓,照收咁多錢咋,唔通收人雙倍咩?唔得㗎!」梁媽媽提醒有意線面人士,應素顏到場,脫體毛者,最好留有約3毫米長度,「剃晒嘅話線唔到㗎!」

對梁家而言,線面除是收入來源,亦連繫着一家人,在Jack眼中,線面這傳統技藝價值重大,有傳承必要,「以前啲人問我屋企做乜,線面?食得㗎?𠵱家個個都識」。然而,梁家上下坦言,沒有開分店的想法,「一家人合力,夠食就得啦!」

港故事

有些人有些事,越是美好越留不住。本土手藝、傳統行業、街頭老店,都帶給我們生活的溫度和記憶的厚度,如果你知道有這樣的故事,歡迎提供。(致電或WhatsApp 6383 6568 註明「港故事」)。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載