› 選擇地區
三藩市
紐約
洛杉磯
其他美國地區
香港 台灣 北美
 
2018年12月14日

爆相爆片:巴士座位爭崩頭
捱肥仔重拳 阿叔面紅

搭巴士雖然唔講得上係同坐一條船,但既然同車,點解唔可以忍讓吓呢?好似周三晚9點幾咁,兩個男乘客懷疑因為爭位坐,喺大欖轉車站轉車時就喺部269C線九巴上大打出手。結果驚動警員到場,仲將兩人都拉晒㖭,其中一個57歲嘅阿叔臉頰紅腫受傷要送院,有乜謂呢!

轉車打埋第二回合

市民莊先生當時就喺現場目擊經過,據佢所知涉事嘅巴士阿叔同另一名着灰色衫、身形肥胖嘅男乘客,喺轉車之前搭另一部69X九巴時已經發生爭執。當兩人落車轉搭269C巴士時,巴士阿叔就從後追上嚟,喝住對方叫唔准走,唔畀阿肥哥仔上269C巴士。

當時肥哥仔身邊仲有個女友人,佢都勸肥哥仔算啦唔好嘈,兩人於是上車,點知巴士阿叔就跟住上車,雙方你一言我一語又爆衝突,仲打起上嚟。莊先生話當時見到有人起腳踢向肥哥仔,之後有人就㩒住巴士阿叔喺車上係咁砌。

現場有女乘客見巴士阿叔似乎無還手之力,一度上前勸對方唔好再打,話:「佢死咗你大件事呀!」但有人就好激動咁大聲話:「佢打我呀,佢搵支筆插我呀,大家見到啦!」事後車長停車並報警,莊先生話雙方打咗十幾秒,有個着黑色衫嘅休班警由上層落嚟,將兩人分開之後帶晒落車。

其間阿叔一度向休班警展示臉部傷勢,話:「我被佢打到咁,佢喺69X已經打我!」惟肥哥仔反駁話:「咁你頭先夠用支筆插我啦!」佢身旁女友人亦幫口話阿叔:「你以為七老八十大晒呀!」之後警員接報趕到處理。

警方話事件中,兩個男乘客本身喺巴士一齊坐,但懷疑因爭位坐問題,有人指對方太大份發生衝突。警員拉咗涉嫌打交嘅57歲姓吳同38歲姓陳男乘客,吳報稱臉部受傷送博愛醫院治理,而陳亦話胸口痛,但就唔使送院。

爆相爆片

爆相畀$500、爆片送$1,000嘅基本獎賞外,仲會選出每周之星,每星期最高單日總點擊頭5名即刻科水$10,000,而每月15號至翌月14號期間獲得全月最高單日總點擊者,更可以成為每月盟主,額外獎賞$100,000,係$100,000!爆相爆片必須為本報獨家採用,一經刊登立即有獎!

爆相爆片WhatsApp:6383 6568

參加細則

1.爆相爆片必須由參加者拍攝。
2.若本報發現任何造假情況,將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利,如有任何爭議,以本報決定為準。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載