蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年12月08日
馬上成為壹會員

自創洗腦歌 短片接地氣
任何仁之父「救人係救一個家庭」

【本報訊】「左手、右手、直手擺喺心口」是消防處短片的洗腦歌,宣傳心肺復蘇法(CPR)及自動體外心臟去顫器(AED機),片中「任何仁」出街後人氣爆燈!創作團隊昨大談創作意念,笑指以「估你唔到、接地氣」方式教育公眾急救意識,短片故事更取材真人真事,冀帶出「救人唔係救一個人,係一個家庭」。
記者:張文鈴

創作「主腦」、消防處署理救護監督(新界西南)周詠賢表示,「任何仁」雛形是宣傳CPR和AED機課程的卡通人物,「個時睇咗唔同種類卡通公仔,但技術唔太專業就用簡單線條,一個人頭加兩隻手同腳」,且全身藍色是因處方常用紅色,故顏色上有強烈對比,整個構思花了數個月。他指,原擬藍色毛公仔但因需用手指示範CPR,故改以貼身衣造型。

「星如篇」內容真人真事

短片創作均由周自編自導,首次執導的他明白若以教條式向公眾宣傳CPR未必入腦,因此以一個「估你唔到、接地氣」方式呈現。當中「擊活人心」短片三部曲的「靈異篇」歌曲更出自他手,「左手、右手、直手擺喺心口,個首我係唱一次畀屋企小朋友聽,之後佢竟然識唱返出嚟,我先敢擺落去」。短片推出後市民反應是出乎意料的好,令他感到意外。

他個人喜愛「星如篇」,因內容取材自一、兩年的真人真事。當時一名父親在做運動期間心臟病發,幸而有人即場為他進行CPR和AED機,終於救回一命。他說:「如果唔係有人伸出援手,可能佢就見唔到佢幾個月大嘅BB同太太,仲有個60幾歲爸爸。」事件令他明白到「救人唔係救一個人,係一個家庭」。他強調,「任何仁唔係一個人,係一個概念」,代表任何人都可以在危急的情況下協助救人。

任何仁出街後一度傳來「死訊」,他稱沒有聽聞有關消息,反指部門管理層對任何仁絕對支持,「老實講創作係部門有胸襟包容好難得」。對於有部份網民惡搞和負評,他指不會因批評而不開心,因不同人有不同想法。

另外,救護監督(社區應急準備)吳宛茵表示,短片推出後有很多人報名上堂,「擊活人心課程每日都收到電話」。她透露,未來宣傳會視乎內容,「(任何人)加入更多元素,或者有冇其他服飾,請大家到時拭目以待」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載