蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年12月07日
馬上成為壹會員

隔牆有耳:聽局長為大灣區解畫
王宗堯寸聶德權:冇乜用 - 李八方

聶德權會後捉住王宗堯解畫。林俊謙攝

2018年就快結束,五大傳媒機構包括商台、有線電視、有線寬頻、《星島日報》同埋《英文虎報》,聯手合辦「2018十大新聞選舉」,畀巿民喺29則重要大事中,選出本港十大新聞。

現身活動嘅政制及內地事務局局長聶德權,自然好「政治正確」咁揀粵港澳大灣區啟動,但同場嘅「男神」王宗堯就借呢單新聞同明日大嶼願景,乘機寸爆政府同聶德權。

票選十大新聞

今次29則新聞中,包括「律政司司長鄭若驊為大宅多處僭建道歉」、「外國記者會安排陳浩天演講,副主席馬凱被拒續工作簽證」等,聶德權好識做揀「粵港澳大灣區啟動,特首成為建設領導小組成員」呢一則,話因為同佢工作關係範疇好有關,亦都非常重要。

「男神」王宗堯同聶德權揀埋同一則新聞,但就有完全唔同演繹,佢一上台就搞笑介紹自己係「中國香港大灣區嘅王宗堯」,仲話一定要講吓「中國香港」,笑言:「係要咁講,如果唔係會俾人DQ㗎嘛!」男神另一心水新聞,就係「施政報告倡明日大嶼願景,擬填海1700公頃造人工島」,話:「我哋用1,100億元去起一個人工島出嚟,個島會唔會漂走?會唔會去咗大灣區呢?」

可能聶德權都聽到男神對上述政策好多疑問,會後即時捉住男神解畫。男神就向八方透露,聶德權話佢知大灣區包括香港同好多城巿,「佢(聶德權)話唔係一定要搬晒所有香港人上大陸住喎!」佢聽完就回應:「我知,我有睇新聞。」覺得局長嘅解釋「冇乜用」喎。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載