› 選擇地區
三藩市
紐約
洛杉磯
其他美國地區
香港 台灣 北美
 
2018年12月06日

隔牆有耳:為社民連籌款晚會「獻藝」
陳淑莊做織女 趕製1.8萬元頸巾 - 李八方

Tanya親手織嘅溫暖牌頸巾,唔係為咗送畀心上人,而係送畀社民連籌款晚宴中嘅有心人。陳嘉裕攝

天文台早前預告星期五氣溫會顯著下降,下周日及周一仲可能低見12℃,唔少人都預備定頸巾大衣保暖。而噚日立法會內,八方就見到公民黨陳淑莊(Tanya)喺會議廳外密密織溫暖牌頸巾,唔通面臨政治檢控嘅佢,又要為寒冬做準備?Tanya解釋,勤力密密織係因為上星期六社民連嘅12周年會慶兼籌款晚會,有善長用1.8萬元投得佢親手織嘅愛心頸巾一條,所以佢要加快趕工,準備聖誕前交貨。

原來Tanya嘅織冷衫技巧,係由佢婆婆同媽媽傳授,佢話細個不時見阿婆織冷衫,有乜嘢唔識都會請教佢哋。

兩日織咗40吋

雖然對上一次織冷頸巾已經係10幾年前,不過重新上手都冇生疏,兩日已經織咗兩嚿毛冷約40吋,佢仲可以一邊織一邊同八方傾偈㖭。

織頸巾最難係乜嘢呢?Tanya話唔係編織技巧反而係唔夠毛冷,佢原先預計只需要四嚿冷,但織織吓先發現原來唔太夠,去毛冷舖補貨時先發現賣斷市,所以𠵱家要朋友幫手睇吓可唔可以再搵多一至兩嚿毛冷,否則頸巾可能就會唔夠長。佢仲叫八方幫手,呼籲讀者如果有草綠色混色毛冷,可以出讓畀佢,又笑稱呢兩日因為織頸巾所以少咗出夜街,𠵱家人如其名做到「賢淑端莊」咁話喎。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載