› 選擇地區
三藩市
紐約
洛杉磯
其他美國地區
香港 台灣 北美
 
2018年12月05日

隔牆有耳:國師新焦土 倡馬丁提自決博DQ
「預咗你燒,但你係唔夠膽燒」 - 李八方

九西補選民主派再次敗北,令人擔心嚟緊將會出現嘅新東補選DQ陰霾下民主派會一輸再輸,城邦派國師陳雲噚日接受港台訪問時就提出新想法,建議民主派由民主黨創黨主席李柱銘以自決立場報名參選新東補選,若然特區政府選擇DQ就會有國際輿論,唔DQ又即係放生自決,無論如何都會搞到一身蟻,又話叫民主派撤出議會,不過同場嘅黃之鋒就認為國師條橋根本唔work,唔會因為咁令國際社會更關注香港。

之鋒反駁︰國際未必會關注

陳雲形容佢嘅建議係「控制之下嘅焦土論」,佢仲提出可以由公民黨黨魁同民主黨主席以自決主張參選,最終「成個黨唔玩」,或者整個泛民撤出議會,不過咁咪等同令民主派失去議會話語權?陳雲覺得同𠵱家分別唔大,但效果就會令國際社會知道香港自治削弱,美國政府就會向中國施加壓力,等中共唔可以再干預香港選舉同其他運作喎。

不過在場嘅香港眾志秘書長黃之鋒唔同意陳雲講法,佢用新加坡反對派都試過全面撤出議會,同埋澳門立會民主派嘅議席較少為例,都唔見得因為咁國際社會有特別嘅關注!

呢個時候陳雲又改口話全面撤出議會未必會成真,又話政府或者中共都習慣咗反對派存在,又話中共係唔習慣冇咗民主選舉嘅幻像,仲講佢嘅焦土係「我係預咗畀你(政府)燒,但你(政府)係唔夠膽燒我」。聽到呢度,連八方唔知佢噏緊乜。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載