› 選擇地區
三藩市
紐約
洛杉磯
其他美國地區
香港 台灣 北美
 
2018年11月27日

隔牆有耳:「old爸」加埋175歲
譚志源 高永文 蘇錦樑跳K-Pop鈣質舞 - 李八方

三個前局長組成「TKS」,扮oppa跳hip hop贏得唔少掌聲。

立法會第一大黨民建聯噚晚喺會展搞籌款晚宴,一眾前高官議員唔只畀面出席,更加跳舞贈興,不過每次必定引起政圈關注嘅西環捐贈天價拍字畫籌款今年就冇出現,改為由西環高官開金口為民記籌款。

何靖唱《我的中國心》籌900萬

兩年前時任中聯辦主任張曉明一幅「度德而處」字畫,為民記籌得1,880萬元成為全城焦點,今年西環雖然冇捐字畫,但中聯辦副主任何靖大開金口唱歌,一首《我的中國心》就籌得900萬元。至於張曉明因為去咗做港澳辦主任冇出席,不過由佢親筆題字嘅郵票珍藏冊拍得220萬元,大幅「降呢」。至於其他拍賣物品,賣最貴嘅就係國學大師饒宗頤一幅「量寬福厚」字畫,由世茂房地產主席許榮茂以1,000萬元投得。

至於李慧琼獨唱《中國心》獲500萬元捐款,曾鈺成同譚耀宗表演棟篤笑就至少籌到510萬元。不過全場最爆係三個前局長譚志源、高永文加埋蘇錦樑扮成oppa大跳hip hop,佢哋完全冇包袱,仲自稱「TKS」,為咗效果譚志源帶埋假髮跳舞,跳跳下仲除埋外套,都贏得唔少掌聲,佢笑稱自己係重拾30年前個樣咁話。

另外,前日補選勝選嘅陳凱欣噚日都有出席,搞到好似建制派祝捷會咁,民建聯主席李慧琼問究竟11.25同11.26有乜關係呢?就係前日係投票日,噚日就係「投鈔票」日,呼籲在場人士捐款支持。

如果大家記性好,一定記得特首林鄭今年出席民主黨黨慶主動贊助民主黨員唱歌,事後引起大和解風波;噚晚林鄭坐足全場,但冇舉手贊助拍賣,只係幫手頒發拍品。民記噚晚至少籌得5,420萬元,未計部份未有公開嘅表演捐款。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載