› 選擇地區
三藩市
紐約
洛杉磯
其他美國地區
香港 台灣 北美
 
2018年11月27日

心藏筆露:改變自己的神奇力量

在一間餐廳裏,一夥人正在興高采烈地分享他們湊仔的經驗。

「之前每逢星期五晚,我就會忍唔住喪飲酒。即使試過被停牌,但都係戒唔到。但近半年,因為逢星期六朝早我想揸車送仔仔去學游水,如果之前嗰晚飲大咗,第二朝就會起唔到身。𠵱家嘅星期五夜晚,自自然然就會停咗飲酒,雙腳會自自然然識得行返屋企。好神奇!」

「我都係呀!好神奇㗎!之前每晚都玩手機,玩到失眠,醫生警告我會變精神病。我個心好驚,但都係戒唔到。幾個月前,我見到囡囡越嚟越沉迷手機,對書本冇興趣。然後忽然有種神奇力量,令我好似鬼上身咁樣,去買成語故事書,仲每晚飯後都睇幾頁,之後好快瞓得着……你要中文水平好,一定要真心感受中華文化嘅美麗……」

「我都覺得好神奇!之前老婆成日鬧我,話我次次關門嘅時候都好大力,嘈親佢,又粗魯又冇文化。我都知自己唔啱,但係真係改唔到。不過自從上個月BB學識行路之後,我驚關門時夾親佢啲手指,腦裏面就自自然然喺關門嘅時候,有把溫柔嘅聲音響起,提醒我要細細力。」

到底這是甚麼的神奇力量呢?如此「神力」源自一段最美好的關係。甚麼是美好的關係?能令雙方都變成更美好的人,就是一段美好的關係。在父母心目中,兒女就是自己愛到發燒的人,就是一個只是凝望一眼就會令自己心甜的人。他就是我的小王子;她就是我的天使愛美麗。所有的付出和犧牲,都帶有無限的意義,是不用計算及解釋。

人類的腦袋,追尋「意義」是天性。尋找意義的慾望,有時比起求生存的更加強烈。所以,死亡的威脅都不能令我們就範,意義反而令我們臣服。「令兒女變成一個更美好的人」意義爆棚,爆發出開山劈石的神力,令自己有意想不到的改變,變成一個更美好的人。所以,育兒即使辛苦到不得了,但仍然有千億人甘之如飴,迎難而上。

隔周二刊出
撰文:青山醫院精神健康學院副顧問醫生崔永豪

想輕輕鬆鬆健康啲,記住留意健康蘋台
http://health.appledaily.com.hk/

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載