蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月27日

呼籲焦土 陳國強:冇諗過咁大鑊

38,582
陳國強

【本報訊】有本土派選前呼籲投白票,九西區內更湧現「焦土」橫額,為大局含淚投票抑或為己見射票落海對本土派來得更重要?補選結果或有啟示。

相關新聞:黃埔謝票 阿人:以後只助選

「我哋係嘈吓咋」

李卓人與馮檢基獲合共得票約10萬票,與3.11九西補選民主派姚松炎獲得票數相若,但對比非建制派陣營於2016年立法會換屆選舉時奪得約16萬票,民主派兩次補選都少近6萬票,兩次補選特徵都是沒有本土派、激進民主派入場,不難預計大批支持本土派的選民未有投票。

選戰前夕曾於網上呼籲「有心人」提供「焦土」論橫額,呼籲選民全投白票的沙田區議員陳國強指,最終只掛了兩塊橫額,形容行動只是「想有啲姿態嘈吓」。他坦言對李卓人落敗感意外,「我初初諗住人哥贏喎,我哋係嘈吓咋,點知𠵱家真係大鑊,(李、馮)兩個加埋(啲票)都唔夠陳健康(指陳凱欣),真係諗唔到呢個結果」。

他更稱有本土派得知結果後向他發訊息稱「大鑊嘞,人哥贏唔到」,又來電稱要「砌」自己:「我就話你哋無理由全部入我數,你哋全部有份鬧!」他指據其所知,本土派、激進民主派「投阿基哥嘅真係無,睇返同上次差唔多,但真係諗唔到人哥(啲票數)差咁遠」。陳國強其後在facebook補充:「我指的本土派,只係講我熟悉的兄弟……不是全部兄弟都覺得好大鑊!」
■記者林俊謙

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載