› 選擇地區
三藩市
紐約
洛杉磯
其他美國地區
香港 台灣 北美
 
2018年11月23日

爆相爆片:惡客搭霸王車爆車窗 的哥擒人

惡客(箭嘴示)折返用手踭再打爆的士尾玻璃。

的士司機最慘遇着惡乘客,好似上周一朝早6點幾咁,有位的哥就喺香港仔石排灣邨同個後生仔乘客爭執,原來係有人搭霸王的。個惡客恃住大聲,追打司機同打爆的士車窗後想離開。嗰位的哥梗係唔放過佢啦,糾纏間就將個惡客整跌喺地制服,保安員同街坊都幫手,最後將個惡客交畀警方。

網民大讚「食過夜粥」

現場有好多街坊圍觀,仲拍低咗條片,見到當時個惡客一度追打嗰位的哥,好彩的哥左閃右避冇被打到。個惡客之後走埋去部的士度,出手打爆右邊玻璃窗就想走,的哥見到咁就跟住對方,個惡客發難:「過嚟呀,過嚟撳錢呀!」又突然走番轉頭去的士車尾,用手踭打爆埋個大銀幕。

事件中的哥好淡定,一路吊住惡客尾,其間個惡客忍唔住,走向的哥揮拳,但統統俾的哥以花步嘅姿勢避過。雙方糾纏間的哥仲將個惡客整跌喺地上,扯住頭髮同捉住右手制服。個惡客不斷掙扎,仲大嗌:「你知唔知我邊L度呀?」有網民睇完片就話笑咗,揶揄個惡客:「大家都知,你係瞓L咗喺度。」亦有網民讚的哥食過夜粥,好嘢。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載