› 選擇地區
三藩市
紐約
洛杉磯
其他美國地區
香港 台灣 北美
 
2018年11月22日

隔牆有耳:針拮到肉知邊個痛
慢必爆肌壯膽 孕媽容海恩淡定 - 李八方

立法會噚日朝早開會前,先喺宴會廳舉行接種季節性流感疫苗活動,唔少議員都一早到場排隊打針,包括預計年初一就會生BB嘅新民黨容海恩。容海恩打針前後攞牌影相,宣傳準媽媽都可以打流感針,打針期間更一直笑容滿面,唔似部份男議員咁面露痛苦表情,絕對係今日「最佳表情獎」得主。

醬爆唔執輸

一眾男議員其後把握立法會呢個一年一度「騷肌」機會,當中以近年勤力健身的人民力量「慢必」陳志全最吸睛,因佢一除恤衫,一身肌肉已引來嘩聲四起,連醫學界議員陳沛然都忍唔住上前,捉住佢右手叫佢騷吓老鼠仔,「最佳身形獎」當之無愧,不過慢必打針嗰刻就冇咁威猛,表情仲相當緊張!跟住打針嘅工聯會「醬爆」陸頌雄,疑似見慢必咁受歡迎,有樣學樣除晒衫打針,但做法就被剛入場嘅民建聯陳克勤笑爆:「你唔使除到咁吓話?你喺度做咩嘢啊?」

但今日榮獲「最搞笑大獎」嘅一定係自由黨邵家輝,皆因佢同大台女星馮盈盈現身台慶時一樣「冇打底」,一除咗件外套,恤衫即時「凸點」,連建制派議員何君堯睇到都忍唔住笑笑口講:「叫姑娘畀兩個護貼你吖!」邵家輝其後可能怕醜,選擇低調喺屏風後打針,再着番外套試圖快閃離開,其間有立法會女職員捉住佢問:「你打完針嗱?」笑佢欺場喎!

食衞局局長陳肇始話每年一月至三、四月都係季節性流感高峯期,政府都呼籲巿民接種疫苗,尤其係高危人士要盡快打,包括老人家、長期病患者、孕婦或者小朋友。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載