› 選擇地區
三藩市
紐約
洛杉磯
其他美國地區
香港 台灣 北美
 
2018年10月30日

隔牆有耳:
「明日大嶼」 爆罵戰 
卿姐:我俾陳健波欺凌 - 李八方

「明日大嶼」1,700公頃人工島計劃觸發爭議,特首林鄭月娥早前話自己因此與藝人劉德華同受網絡欺凌,估唔到近日又有另一受害人!政府預計明年上半年向立法會財務委員會申請前期研究撥款,財委會主席陳健波日前發表「反填海是歷史罪人論」,揚言可以喺十幾粒鐘通過撥款,因此同曾經做財委會主席嘅民主黨劉慧卿隔空對罵,陳健波甚至拍片反擊卿姐,政界成地花生殼,卿姐噚日喺網台節目談論事件時笑稱被陳「欺凌」,指自己批評陳喺政府未向立法會交文件前已就辯論時間設限,反而被指摘,「整乜啫,大家變咗奴才啊?」

不滿為填海辯論時間設限

卿姐話當年擔任財委會主席時,前運房局局長鄭汝樺為咗興建高鐵申請撥款,都向佢表示希望開40小時會議,「我都話咩話?」但對方表明議員「好多嘢講」,希望畀夠機會議員發言,卿姐認為呢個做法先正當,等議員「講到我唔講」。

作為過來人,卿姐話財委會主席要捍衞立法會同財委會嘅尊嚴,而唔係作為政府嘅強大支持者,特別覺得相關項目具極大爭議,以及仲未經其他事務委員會討論,咁情況下已向政府示意毋須擔心,畀10幾個鐘會議時間討論就可通過,認為咁講係「荒謬及可恥」。雖然意見不同,但唔代表唔可以同場辯論,卿姐笑稱已邀請陳健波出席佢嘅節目,或者屆時會有更多火花。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載