› 選擇地區
三藩市
紐約
洛杉磯
其他美國地區
香港 台灣 北美
 
2018年10月30日

爆相爆片:
大小「拜山黨」 同先人爭食

有巿民在粉嶺和合石墓地拜山時,驚見兩隻野豬出沒。

除咗鄭小姐喺香港仔同野豬喜相逢之外,市民廖小姐星期日下晝3點幾,亦喺粉嶺和合石近浩園嘅墓地拜山時,見到兩隻一大一細嘅野豬嚟「拜山」。廖小姐話當時現場得佢同屋企人喺度,冇其他人拜山,佢帶咗隻雞同生果,都未將啲食物攞出嚟,點知兩隻野豬見到膠袋就離遠走埋嚟,相距只有3個墳頭位咋。

相關新聞:爆相爆片:咁先係Happy Ending! 野豬一齊BBQ

睇中祭祀食物

廖小姐話覺得好驚,一度叫屋企人:「你使唔使丟咗啲嘢食先,我驚佢哋(野豬)衝埋嚟!」不過之後兩隻野豬就行過咗,繼續四圍「搵山拜」。個幾鐘頭之後,廖小姐同家人拜完山,但兩隻野豬喺度仍然未走,似乎係吼住啲拜祭完嘅食物。

廖小姐話,當時兩隻野豬行得好近,最近只有一個墳頭位,大家喺度你眼望我眼。咁啱有多啲人上嚟拜山,佢哋見到野豬都嗌晒:「有野豬呀!」顯得好驚青咁。之後廖小姐就執埋啲嘢,早走早着,但兩隻野豬一度跟住佢落埋樓梯,然後先走咗去另一邊墳頭,真係嚇餐飽。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載