› 選擇地區
三藩市
紐約
洛杉磯
其他美國地區
香港 台灣 北美
 
2018年10月29日

隔牆有耳:
吳錫輝爆料 阿松會考唔夠分 
靠眼淚留喺英華 - 李八方

今年係傳統名校英華書院200周年校慶,校方為咗大事慶祝搵埋一班名人校友聚首,為200周年主題曲《天地人》拍攝MV。唔講唔知,前財爺梁錦松同前副廣播處長吳錫輝原來係同班同學,噚日趁住拍攝MV,吳更大爆阿松中五會考後唔夠分升讀原校,淚灑籃球場被副校長發現,最終成功入返中六,阿松都話如果唔係副校長收留佢,都唔可以有今日成就呀。

今次英華200周年校慶都可以話係名人齊集,政界方面有胡官胡國興、前財爺梁錦松、個人資料私隱專員黃繼兒、前政制及內地事務局副局長陳岳鵬等,而演藝界方面就有歌神Sam Hui許冠傑同埋DJ黃志淙。

為英華200周年拍MV

阿松接受吳錫輝訪問時,俾吳大爆佢中學會考成績唔好,怕讀唔到中六而淚灑籃球場。阿松亦都坦白承認,原來佢會考得兩科C,本來無緣喺英華升讀中六,結果副校長發現佢喺籃球場喊,了解情況後就收返佢入讀中六。之後佢當然「知死」,發憤讀書終於拎3A入讀港大,佢話當日唔係英華收留都入唔到港大,令佢繼續向上發憤。

而私隱專員黃繼兒就係中六先入英華,佢話當時好多同學屋企環境都唔好,所以會一齊喺班房留宿,而佢印象深刻嘅就係當年邀請女學生返學校開Party,竟然俾校長用手隔開,唔畀佢哋太親密。

今次為咗慶祝英華200周年,校方就搵嚟許冠傑唱作校慶主題曲《天地人》,而未來更加會同香港郵政發行「英華書院二百周年校慶郵票小型張」,仲會有歷史展覽㖭。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載