› 選擇地區
三藩市
紐約
洛杉磯
其他美國地區
香港 台灣 北美
 
2018年10月25日

隔牆有耳:元秋派靚餅
立會冇飯食?食cake啦! - 李八方

蔣麗芸噚日請立法會傳媒食西餅,順便讚吓新聘請嘅「蔣毛毛」。

立法會大會每逢星期三、四都會由朝到晚開會,為咗令議員唔使餓住個肚,秘書處通常會喺宴會廳為議員安排午餐同晚餐。

常提早休會 取消晚餐服務

唔知係唔係因為梁君彥做主席後經常提早休會,議員可以唔使開會開到深夜,仲可以趕到返屋企食飯,令到晚餐需求量好低,結果秘書處今年度開始,決定取消晚餐服務。

經常會去宴會廳食晚餐嘅民建聯蔣麗芸Ann噚日就大呻,冇咗晚餐服務好唔方便,如果當日8點先完會就會等到好肚餓,雖然宴會廳冇咗晚餐服務,但都無損元秋心情。佢噚日就請立法會傳媒食餅,順便介紹佢新聘請嘅一眾「蔣毛毛」,佢話新上任嘅「蔣毛毛」畀咗好多意見佢,一入職就幫佢拍攝咗唔少短片,成績令人滿意,所以派餅益街坊喎。

不過元秋又唔使咁擔心會餓親,因為配合取消提供晚餐服務,秘書處亦將五樓咖啡閣延長服務時間,如果元秋、甚至其他議員真係肚餓,仍然可以去咖啡閣醫肚,而呢個服務亦可以令議員夜晚即使要醫肚,亦唔使離開立法會大樓,即使議事廳入面唔夠法定開會人數,要call人返去開會,又或政府要箍票,都唔怕議員趕唔切返嚟開會。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載