› 選擇地區
三藩市
紐約
洛杉磯
其他美國地區
香港 台灣 北美
 
2018年10月10日

隔牆有耳:欣‧為你 建制同鄉被眾籌
多多益善 最少$10 - 李八方

食衞局前政助陳凱「欣」為你突破界限,之前喺建制群星拱照下宣佈參選11.25立法會九龍西補選,雖然銳意打造「獨立」角色,但當日清一紅色親中人士站台,最突破界限嘅反而是眾籌選舉經費。
能夠代表建制派參選,會唔會真係要眾籌?恐怕唔使八方多講!八方就收到報料,繼省市級政協收到柯打,人人要交朋友讚好陳凱欣嘅fb專頁「交數」後,建制同鄉會再落order,各會友要「被眾籌」出錢撐陳凱欣。

「陳凱欣為香港好又專業」

八方收到報料話,左派社團「香港河源社團總會」近日動員會友捐款,最少捐10蚊,講到明要「聚人氣」,據知有逾60個會員已捐款,一共籌得逾6,000元,並在內部群組載列捐款名單及數額。
香港河源社團總會秘書處陳小姐回覆《蘋果》查詢時,承認有搞眾籌呼籲,因為見到陳凱欣為香港好,又有專業知識,所以呼籲會員捐款幫手,堅稱無目標亦無限期,又話金額隨意,冇話唔捐會有乜後果,後來河源總會常務副主席黃敬再主動聯絡,再解釋係純粹呼籲,「冇push,自願性質嚟」,仲話冇同陳凱欣直接溝通,而且有關訊息只係內部通傳,唔知點解會流出街。
有九龍西建制地區人士同八方講,搞眾籌其實主要係為陳凱欣集氣,有建制中人話,福建、廣東呢類大會未有叫人捐,反而規模較細嘅同鄉會有,其實主要係提醒會員選舉近了。陳凱欣透過助理回覆《蘋果》查詢,話眾籌計劃仍在進行中,對於有市民呼籲捐款表示感謝,亦歡迎市民以小額捐款以示支持。至於有冇叫香港河源社團總會幫手?發言人冇說明。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載