蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年10月10日
馬上成為壹會員

盤踞加州花園加州豪園 有買無賣
張高麗女擁20幢元朗洋房

【巨資泊港】
過去內地太子黨愛將資金泊港,貪香港法治完善,投資環境較內地優越。本報檢閱多個領導人家族的香港物業,近年有減少入貨迹象。評論員劉銳紹指中國一直收緊對香港的控制,「對內地高官或者官二代嚟講,香港早已經唔係佢哋嘅保險箱」,資產放在美國、澳洲更安全。惟國務院前副總理張高麗家族,其女兒以港為家,與夫家已狂掃逾20幢元朗加州花園及加州豪園洋房,連同其他物業總資產值近8.6億元。
國務院前副總理張高麗,其女兒張曉燕嫁予信義玻璃(868)主席李賢義之子李聖潑,生意主要在中港兩地。兩人同樣祖籍福建,近年在港掃貨,連同夫家成員,估計手頭物業市值近8.6億元。

相關新聞:賈慶林孫女24歲斥4億買傲璇

行蹤低調密密掃貨

今年十.一國慶煙花匯演,便是由信義玻璃獨家贊助,耗資約1,000萬元。張曉燕夫婦近年在物業市場吸納不少物業,他們一直居住在加州花園,近年遷往加州豪園相連屋,兩間相連別墅合共實用面積約3,400方呎。而張曉燕夫家,亦愛群居於元朗加州花園,方便照應,現時在該兩個屋苑已「儲」起達20幢洋房。
消息人士說:「張曉燕行蹤低調,但舊年同今年都有掃貨,至今仲繼續物色機會。一般官二代多數買豪宅,但佢唔同,買嘅物業多數係700萬至1,000幾萬,而且從來唔賣,唔係自住就收租。無論係銀碼、地點、同物業類別都唔顯眼。」
據了解,張曉燕與其家婆董系治、姑奶李培埡等,有一同購買物業,部份由中銀香港承造按揭。她來港10多年,已操一口流利廣東話,現有兩女一子。兩個女兒在沙田上學,爺爺張高麗曾經來港探望孫兒。知情人士直言:「每次見到張曉燕都似普通家庭主婦,間中一家大細去元朗睇戲,總覺得佢木無表情。」本報翻閱資料,除了張曉燕在港持續活躍,其他領導人家族已較少在港掃貨。時事評論員劉銳紹坦言,中國一直收緊對香港的控制,對內地貪官或官二代來說,香港早已不是他們的「保險箱」。

官二代搬錢到海外

「香港回歸20年,好多潛規則有大陸政治文化嘅影子,政府都滲入咗國內政治文化,令內地運作模式、經濟規律都慢慢喺香港出現」。很多官二代都是走在灰色地帶上,深知在香港處理資產是踩鋼線,他們會先將錢轉到海外,「如果覺得自己當時得令就留低,知道自己差唔多到水尾,就移民海外」。劉銳紹指出對他們來說,走資到外國一定會比香港安全,「香港已經唔係佢哋如魚得水嘅自由地,另外從利益角度出發,外國政府唔會出聲,因為錢已經到佢哋手,所以官員能轉移嘅錢就轉移」。
2016年廣東破獲的地下錢莊案,涉案金額高達2,300億元,當中央搜集到證據,自然會通緝貪污、逃稅的人,資產放在海外,至少不會直接被充公,「你睇中國100個紅名單,即係中央通緝嘅人,有官員、有企業高層,其中有四成藏身喺美國。外國政府會話『你喺呢度投資,我就畀你政治庇護』,又或者諗辦法將貪官榨乾,先將佢遣返中國,好似百人榜首位嘅中國第一女巨貪楊秀珠,喺美國不斷打官司,最後先被遣返中國。賴昌星同樣喺加拿大係咁打官司,仲有人不斷送錢接濟佢」。賴昌星由2000年到加拿大,經過11年反反覆覆的難民申請審訊、上訴,2011年才被遣返中國。

相關新聞:胡錦濤堂姪公司賣酒店賺3億

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載