› 選擇地區
三藩市
紐約
洛杉磯
其他美國地區
香港 台灣 北美
 
2018年10月07日

明日化星塵 好友憶高錕
網上行創辦人:他行得好前

【追憶光纖之父】
諾貝爾物理學獎得主、中文大學前校長高錕上月離世,今日在香港殯儀館舉行喪禮,下午設公眾弔唁,明日上午舉行告別儀式。「光纖之父」光耀人間,生前友好無不盛讚泰山北斗為學有遠見、為人有情味。《蘋果》找來高錕生前的相交,追憶先輩種種往事。

上世紀90年代,盧永仁走進電訊行業,從此與「光纖之父」高錕結下不解緣。相識超過廿載,從昔日工作上的合作夥伴轉化成相距廿歲的忘年之友,對於故友,盧永仁讚不絕口,「佢係一個好偉大嘅科學家,無論喺科研同埋教育方面,佢對於社會嘅貢獻都好大,甚至之後佢患上腦退化,都唔多唔少令到社會對呢個議題多咗理解同關注」。
現為高錕慈善基金董事的盧永仁90年代在香港電訊工作,1996年創辦網上行,邀請高錕擔任公司顧問,那時互聯網才處於剛起步的階段,「當時高教授畀咗好多睇法同意見我哋,印象中嘅佢好犀利,已經行得好前,睇事情好高瞻遠矚,佢喺1966年已經提出咗光纖理論」。後來盧永仁轉職到其他行業,但與高錕的情誼並未因此而中斷,除了科研外,盧指高錕一直關注香港的教育議題,踏入21世紀,有感當時香港教育的困境,於是找來盧永仁商討,希望能夠創辦一所能幫助下一代面對21世紀挑戰的學校。

相關新聞: 相識70載同窗:他沉靜好奇

關心教育 創「明日之校」

「當時高教授覺得香港嘅中小學教育好兩極化,一邊就係本地學校,可能英文一般,而且比較死讀書;另一邊就係國際學校,佢哋可能比較着重培訓獨立思考能力,但變相中文又唔係太好,所以高教授希望可以創辦一間可以兼顧兩文三語,同埋培養到下一代獨立分析、解決問題能力嘅學校,當時叫呢間學校做Tomorrow's School Today,即係明日的學校」,不久之後,一所非牟利的私立獨立學校弘立書院於2003年誕生,高錕便是創辦人之一。
盧永仁回憶起十多年前的往事,想起當時高錕已出現少許腦退化的迹象,「2000年代初已經發現有少少迹象,嗰陣會同高教授一齊開董事會,佢好多時問過嘅問題,喺會議中間同埋臨尾又會再問多次,2002年高太有同佢睇過醫生,但醫生只係表示佢年紀大,到咗2004年先至真係確診患上腦退化」。2009年,高錕獲得諾貝爾物理學獎,卻已忘記了自己的成就,盧說,「但佢令人明白到腦退化係點樣嘅一回事」。

「間接教育大眾認識腦退化」

回到2009年,當時阿茲海默症在香港仍然被俗稱為「老人癡呆症」,「當時社會冇太大嘅認知,而且呢個係比較負面嘅標籤,就令到更多人唔係好想去診斷」,後來經正名為「腦退化症」,亦有稱為「認知障礙症」,盧永仁說,「其實教授都係indirectly咁去教育緊大眾」。盧永仁指,近十年間公眾對於腦退化的認知度提高了很多,「不過對於患者同照顧者嘅支援仍然唔足夠,政府其實可以再做多啲」。
在盧眼中,這位故友的無私精神以及對於理想的追求,對整個社會起了深遠的影響,「呢個世界上有好多好好嘅科學家,但偉大嘅科學家好少,高教授係其中一個」,他記憶中的高錕,永遠都是那副謙謙君子的模樣,「佢份人好斯文,一啲都唔囂張同埋唔自私,佢嘅無私精神真係好難得,將一生都貢獻咗畀個社會」。
■記者李雨夢

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載