› 選擇地區
三藩市
紐約
洛杉磯
其他美國地區
香港 台灣 北美
 
2018年09月23日

恐信徒須加入愛國會
陳日君憂香港教區淪陷

【中梵協議】
【本報訊】中梵簽訂主教任命協議,在此議題上與教廷「唱好派」打對台的天主教香港教區榮休主教陳日君樞機怒斥做法醜陋,「咁嘅條件下成功咗,對整個教會都係悲劇」。他深信大陸管治教會的方式會席捲香港,屆時香港教友隨時要加入愛國會,教會學校未必能談信仰。
記者:張嘉雯

相關新聞:各取所需 掃除建交最大障礙

陳日君去年到訪東歐,了解昔日教會如何應對共產政權,發現當時教廷和匈牙利政府簽訂的秘密協議包含驚人條文——若教會內有人批評政府,當局會把名單交給教廷,由教廷跟進處理,「𠵱家(同北京)簽啲秘密協議,係咪又係類似嘅嘢?」
對於盛傳日後任命主教會先經當地教會互選投票,再把人選交給教宗批示,他認為做法比現在每次任命時雙方暗裏角力更壞,「民主投票?民主咪即係佢獨立自辦囉,教宗每次都否決,卒之都係會投降㗎,你夠膽否決10個咩?有時表面上睇嚟好似無傷害,但決定性嘅權力係畀咗政府」。在協議下,雙方需互認對方的主教,包括北京接納30名梵方承認的地下主教,「畀佢入(中國官方)主教團,好似好大嘅恩惠喎,即係逼佢入鳥籠裏面呀!地下(教會)啲人好驚,你以為佢(北京)點解同你簽呀,因為想用梵蒂岡嚟消滅地下教會呀」。
他相信中共極有可能要求地下主教轉任沒有繼承權的輔理主教,再另外委任「自己人」任正權主教,「教會就係咁,要趕走一個人,畀佢升級,其實係假升級,搶咗你個位,然後承認你係榮休主教囉。」他指去年底被要求讓位的汕頭莊建堅主教仍有向他求助,他有再去信羅馬,希望信件可以順利送達教宗手上。至於梵方要承認的7個非法主教,部份傳聞已婚或有子女,向教廷認錯求寬恕,陳日君對此氣憤難平,「話佢哋承認自己錯咗,唔係政府准許佢哋可以認錯㗎咩?政府叫你認你咪認囉」。

指教會國際地位動搖

他直言在上述條件下簽協議等同教會投降,「最可笑係話簽咗等於(北京)承認教宗係教會嘅領袖,我哋要佢承認㗎咩?要跪喺習近平面前要佢承認你係教宗?」身為教會一員,他對教廷的態度感慚愧,深信教會的國際地位亦會被動搖,「將來共產黨倒台喇,你哋天主教企開啲,建立新中國,你哋同共產黨一齊,冇你哋份!」陳日君相信,隨着協議簽訂,內地管治教會一套很快殺到香港,至於日後香港主教任命需否請示中共、香港教區會否加入愛國會,他如此回應,「大陸啲嘢會搬嚟呢度㗎喇,無乜出奇㗎喇,將來好多都要靠教友(堅持)㗎喇,我哋就睇唔到㗎喇,我哋冇眼睇㗎喇」。
「全個香港同大陸都差唔多㗎喇,教會會例外㗎咩?林鄭講宗教,你以為佢疏忽講錯?佢係有計劃咁講㗎。」陳日君自己會入愛國會嗎?「好似上海金(魯賢)主教咁,佢話自己老喇,都唔會逼佢加入嘅,我唔出聲夠㗎喇,我老喇(記者:你就老啫,咁香港仲有其他主教㗎嘛?)86歲仲唔夠老呀?咁唔關我事喇,我唔係救世主,等佢哋自己救自己囉」。
整體香港的言論空間,他相信會繼續收窄,「冇得講㗎喇,尤其嗰啲靠政府食飯,靠教會食飯嘅,又更加會麻煩啲。」而學校的情況就更難想像,教會學校的學生也未必能接觸信仰,「好快有大問題㗎喇,𠵱家已經唔係我哋辦學,係政府辦學,喺大陸唔係我哋辦教,係政府辦教」。他鼓勵教友堅持信仰,「文化大革命,信仰都保存啦,所以我哋唔好睇眼前,我哋睇遠啲,我哋唔係救世主,做咗可以做嘅嘢就得,唔怕唔怕,我哋喺天主手中」。

相關新聞:成中共打壓「最強後盾」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載