蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月08日
馬上成為壹會員

「你唔係仲信政府吓嘛」
想退後 嚴敏華要跑數

軒尼詩道是遊行必經之路,與嚴敏華的新辦公室只一街之隔。謝榮耀攝

軒尼詩道是遊行必經之路,與嚴敏華的新辦公室只一街之隔,但身份不同,心情也不同。昔日寫上政治口號的T恤,換上今日的套裝皮鞋,馬尾束在腦後,就像城市內你我熟悉的上班族,勤懇進取,口若懸河。「我叫人買保險,一定會講呢句:你唔係仲信呢個政府吓嘛?全民退休保障,爭取咗10年都遙遙無期,除咗自求多福仲可以點?」在東北案終審判決前兩個月,嚴敏華考了保險代理牌照,走進人生下半場。「預咗維持原判,入去坐埋嗰幾個月,最擔心係跟唔到單又跑唔到數。」26歲的她說。
記者:呂麗嬋

相關新聞:發展計劃爭議不絕 千人闖立會抗剪布

曾幾何時,嚴敏華有「社運小辣椒」之稱,指天椒級數。2011年《金融時報》亞洲版頭版刊登她聲援艾未未的被捕相片,2012年七一遊行她因咬傷女警長被裁定襲警罪成,還押更生中心,去年又因反東北案入獄13個月。10年間兩度入獄,如今遇到不公義,她仍然感到憤怒,但不諱言,步履沉重了,顧慮也較以前多。

「從無後悔過公民抗命」

「我從無後悔過公民抗命,但如果知會坐監,坦白講可能會考慮多啲。我有家人,始終要為佢哋諗,抗爭成本太高,受咗兩次,唔想再坐第3第4次監」。出身基層家庭,母親是推拿師,父親是退休司機,嚴敏華前年與來自非洲多哥的丈夫註冊結婚,住在大角嘴劏房,「個天對我叫做唔錯,未坐監時佢(丈夫)工作嘅文件剛好批咗出嚟,𠵱家做工程,有收入,生活好好多」。
17歲投身社運,今年26歲,這個在示威區總是情緒高漲的烈女,坦言走得有點累。「我最記得嗰時仲讀緊中六,參與維園行動。一班人喺涼亭傾五區公投,當中仲有黃浩銘」。反高鐵、佔領滙豐銀行,傘運,她無一缺席。
17歲前的嚴敏華,套用她的說法,是乖,但面目模糊。在保守的主流學校讀書,她直言格格不入,就如坐監。「校服裙係同學之中最長嗰個,短頭髮,交功課準時,永遠不過不失,只係唔知點解,年年老師嘅評語仍然係特立獨行」。同學在說愛情煩惱,她要不懶搭腔,要不一開口就是:世界上仲有好多嘢值得關注。換來的,自然是同儕間一陣沉默。
「最初參與社運,同學都唔理解,覺得你做呢啲嘢係為出風頭,無光環,反而會排擠你」。我行我素的她自然不在乎,在社運圈,她找到志同道合的朋友、找到心中的理想。
只是人生下半場,她說希望站後一點,重新開始。「保釋後等上庭,無嘢做就喺會展做散工,捧吓餐咁,當時嘅上司見我手腳勤快態度好,問我有無興趣做保險,佢係嗰種典型沉默大多數,好少睇新聞,當然唔認得我」。在沒有前設的環境,看似不同陣營的人,反而「有偈傾」。「佢問得我,我一定要坦白,就同佢講我因為社運坐過兩次監,咁佢當然即時O咗嘴,我有同佢解釋,我追求嘅唔係好虛嘅政治論述,係希望為弱勢發聲,係出於義憤」。夏蟲語冰,原本打定輸數,她的上司竟細心聽完,並說不介意,還多謝她讓自己理解更多。「可能佢好奇怪,覺得我唔似佢想像嘅推欄廢青吧?」她自嘲似的說。
6月考獲保險代理牌照,正式開展新事業。訪問當天重回維園,站在鐵欄前的她,穿的不再是寫上口號的文化T,而是套裝皮鞋,她笑說對這2.0造型已很適應。「以前sell政治理念,𠵱家sell套餐,其實叫人投票,同叫人買衫或者叫人畀錢買保險分別唔係咁大」。小辣椒其實無變,還是一貫直腸直肚。「結婚後我小產過一次,喺公立醫院感受好深,講真,好有錢嗰啲人係唔需要保險,不過我唔係」。就如她的口頭禪:「你唔係仲信呢個政府吓嘛?」沉澱後的結論,是有點無奈,但除了自求多福,她反問:「仲可以點?」

相關新聞:建制派父親引以為榮很堅強 黃浩銘續抗爭

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載