› 選擇地區
三藩市
紐約
洛杉磯
其他美國地區
香港 台灣 北美
 
2018年08月29日

隔牆有耳:
聲討抄牌警變吸嬲 
白鴿區議員認衰 - 李八方

民主黨大埔區議員區鎮樺噚日向公眾致歉。資料圖片

八方早前報道過,民主黨大埔區議員區鎮樺違泊收到「牛肉乾」之後,周六凌晨喺facebook長篇大論聲討抄牌警無禮貌,點知冇人支持佢之餘,佢篇長文仲猛咁吸嬲,惹嚟大批網民留言鬧爆。

強調冇用特權施壓

當時區鎮樺回應過,表明接受抄牌安排,會承擔法律責任,但指嗰位警員態度真係好有問題,出得po都預咗外界反應。事隔3日,區鎮樺終於認衰,噚日再喺fb發文,重申違泊不當會承擔責任之餘,強調對於違泊以及可能對其他道路使用者造成嘅不便,「本人誠懇向公眾致歉」。
區鎮樺更特別澄清,警員抄牌時,佢冇表露議員身份,亦冇要求以此身份獲特別對待,強調「不認同任何利用特權施壓的行徑」,但承認今次處事手法需要改善,並主動提及,「承認在社交媒體上發文的用詞及語氣或有過火之處」,繼而再就此事處理手法嘅不當「誠懇致歉」,重申重視警民合作,期望彼此互相尊重,多謝大家嘅批評同意見,文尾第三度耍冧,似乎都唔想事件再升溫。
不過八方見到呢篇文有成800幾個網民留言,好多仲係繼續鬧,怕且今次關公災難唔係咁易拆彈。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載