› 選擇地區
三藩市
紐約
洛杉磯
其他美國地區
香港 台灣 北美
 
2018年08月29日

爆相爆片:
彈彈波黃雨走佬 
海港城碌去廣東道

尖沙嘴天星碼頭旁邊嘅海港城外面空地,近排舉行緊展覽,設置一個放滿巨型純白彈彈波嘅大球場。不過喺噚日晏晝黃色暴雨警告信號衝擊下,彈彈波充份發揮其彈跳力,跳出大球場嘅框框,有人發現幾個彈彈波一直係咁碌,碌到至少1公里外嘅廣東道,馬路上嘅車、擔遮嘅路人都要左閃右避,即興玩場閃避球遊戲。

路人食波餅 的士慘被圍

讀者陳先生噚日親身落場參與,佢話噚日下晝大約1點經過海港城停車場,突然見7、8個有半身咁高、沾有雨水嘅白色彈彈波衝得好快,由停車場飛出廣東道。佢話當時反應唔切,一擰轉面就有彈彈波迎面飛來,成個人當堂嚇一跳,仲俾其中一個彈彈波撞中大髀,好彩彈彈波唔算重,所以冇撞親受傷,但個身就遭殃濕晒。
片段睇到彈彈波沿住停車場斜路,來勢洶洶咁彈彈吓衝出馬路,有停喺路邊等客嘅的士俾彈彈波圍住,好彩冇人受傷。陳先生話嗰時好大風、好大雨,而且停車場嘅出入口一向扯風,估計因為咁吹晒啲波出嚟。佢話彈彈波碌落廣東道嗰陣,有停車場保安嘗試攔截,但係彈彈波來勢既多且快,結果都係碌晒出街,吸引途人圍觀,部份人都好奇彈彈波點嚟。
由於馬路俾彈彈波佔領,有司機即時停低部車睇,令到交通一度擠塞,另外都有司機響按示意。陳先生話大約15分鐘後再行過上址,發現廣東道嘅彈彈波俾人移走咗,但行到戲院門外,又見有6、7個彈彈波彈吓彈吓。
巨型白色彈彈波係海港城聯同美國空間設計團隊Snarkitecture舉辦嘅展覽,展期由今個月10號去到嚟緊星期日,製作單位介紹創作靈感嚟自細個時候成日玩嘅彈彈波,市民只要攞籌就可以入去大球場自由滾動、掟吓巨型彈彈波。《蘋果》記者事後到現場,發現地下有放咗氣嘅彈彈波,至於大球場嘅彈彈波已經用紗網冚好,避免又吹出街。

爆相爆片

爆相畀$500、爆片送$1,000嘅基本獎賞外,仲會選出每周之星,每星期最高單日總點擊頭5名即刻科水$10,000,而每月15號至翌月14號期間獲得全月最高單日總點擊者,更可以成為每月盟主,額外獎賞$100,000,係$100,000!爆相爆片必須為本報獨家採用,一經刊登立即有獎!
爆相爆片WhatsApp:6383 6568

參加細則

1.爆相爆片必須由參加者拍攝。
2.若本報發現任何造假情況,將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利,如有任何爭議,以本報決定為準。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載