› 選擇地區
三藩市
紐約
洛杉磯
其他美國地區
香港 台灣 北美
 
2018年08月19日

關愛座之父 心痛設計掀批鬥
希望有天不再需要它

【讓座之爭】
從關愛變批鬥,優先座由推廣讓座變成留座,退休九巴員工鄭桂興是當年引入關愛座的團隊骨幹,直認批鬥座的出現實屬始料不及。當年設立關愛座有段古,原希望提升巴士安全,減少長者因心急落車跌傷風險,故在車門附近設關愛座鼓勵讓座。不過他強調乘客人人都有不同程度需要,關愛座原意「從來都唔係留座」,旨在呼籲乘客關心其他有需要人士,讓座爭拗大多始於「唔夠關愛」,若懂得易地而處其實「冇乜好拗」。
記者:鄭啟源

相關新聞:M痛不敢坐 女乘客怕被起底

「聽到連讓座都搞到上新聞,件心血研究搞成咁,都真係幾心痛」。今年69歲的鄭桂興,退休前為九巴安全及服務質量部高級經理,2010年加入九巴,負責「諗計」減低意外數字。當時各種涉及九巴的意外之中,乘客在巴士車廂內失平衡跌倒個案佔一半,長者更佔失平衡個案中的三分一,部門其中一個任務,就是想辦法減少「老友記」跌傷風險。

原意為減長者跌傷風險

引入關愛座研究歷時約半年,鄭桂興說,當時內部曾對長者在車廂失平衡原因做研究,「一來佢哋心急,怕落車落得慢;二來長者出門通常唔係拎枴杖就會拎住一袋二袋,冇手捉實扶手;同埋唔少長者都貪巴士上層視野好,鍾意去上層坐睇風景」。碰巧他當時到訪英國探望在當地讀書的長子,留意到當地巴士已為長者及有需要人士設優先座,便覺得可以借鑑。
根據九巴網頁過去新聞稿,九巴在關愛座實施一年,曾公佈首年成效,2011年涉及65歲或以上長者的巴士意外總數,按年減少了一成;涉及長者在車廂中失平衡個案,在同期間更下降15%。
「我唔敢話計劃成功,只係覺得未算失敗得晒」。鄭桂興說,留意到網上不時出現使用關愛座起爭執短片,感到相當心痛,認為公眾對關愛座使用方式出現誤解。其中一段片段令他印象尤深,片中長者與坐在優先座上的女士爭執,長者要求女士讓座,但女士反駁正值生理周期感到不適,也有使用關愛座需要,不滿因而被長者責罵。
鄭桂興為關愛座使用「攻略」作出解說,「絕對唔係留座,任何人都可以坐,唔係禁坐,亦唔係批判(鬥)座」。他說,巴士車廂座位數目有限,明白每人對座位都會有不同程度需要,「關愛座作用係想大家留意,身邊係咪有人比你更加有需要,喺嗰刻讓座畀有需要嘅人」。
在設計關愛座時,項目團隊曾考慮過,當有需要人士多於4人,關愛座是否要定出使用的優先次序,最後想出一招,「留意一下關愛座頭枕背後有一隻手嘅圖案,寫住『你也可以讓座』。其實就係想話畀後面其他乘客知,車上面咁多個位都可以讓,任何乘客都可以關懷車上面其他有需要人士」。

相關新聞:頭枕黑變紫免長者棹忌

易地而處 「人哋返工好攰」

鄭桂興續說,乘客就讓座問題發表意見前,其實最好先考慮對方是否也有難處,「可能人哋返工返咗成日都好攰,唔可以淨係從自己觀點出發」。他又批評,動輒拍片有如誇大問題的武器,「全架車都唔係嗰4個座位可以讓。除咗拍片,係咪可以考慮建議其他乘客讓個位畀其他人呢?」
對於有立法會議員曾煞有介事要求立法強制要求讓座,鄭桂興直斥多此一舉,若社會真正有關愛文化,「全架車所有乘客都會主動讓座,就連關愛座都功德圓滿可以取消,呢個亦都係我最大願望」。他又笑指,自己乘坐巴士時亦曾獲學生主動讓座,「所以算係失敗唔晒㗎」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載