› 選擇地區
三藩市
紐約
洛杉磯
其他美國地區
香港 台灣 北美
 
2018年08月17日

爆相爆片:兩日冇換衫被認出
快閃雌雄賊落網

終於捉到喇!〈爆相爆片〉周二報道旺角有個大肚婆同男人,喺西洋菜南街一間影音店聯手「快閃」偷咗價值約600蚊配件,間舖頭事後公開CCTV片段及發通牒要求偷嘢嘅人自首。警方前日凌晨喺旺角拉咗嗰對雌雄賊,男嘅着墨綠色短袖恤衫、淺色牛仔褲同墨綠色帆船鞋;女嘅着黑色背心孕婦長裙、紅黑色波鞋。原來兩人一直冇換過衫,被街坊發現通知影音店職員報警拉人。
本周日(12日)晚上10點幾,着背心孕婦長裙嘅大肚婆企喺舖頭外貨架側邊一路食煙一路睇水,兩個人喺30秒內偷走4件價值約600蚊嘅「手機分插」等影音配件後走人,以為神不知鬼不覺,唔知道成個犯案過程同自己個樣已經俾舖頭CCTV影低。
嗰間舖頭姓盧經理批評大肚婆嘅做法係惡劣嘅胎教,原本應該即時報警,但可憐大肚婆可能要坐監甚至喺獄中生仔,佢同上司商量之後諗住畀個最後機會佢哋,喺網上公開CCTV希望佢哋返舖頭畀錢和解,結果佢哋冇出現,舖頭喺星期二晚報警。

大肚婆涉藏冰毒

至前日(15日)凌晨12點,盧經理收舖嘅時候收到巿民打電話通知佢,話見到嗰對雌雄賊喺朗豪坊對面嘅吉野家,佢同職員即刻過去,果然見到嗰對男女,「兩個幾日連衫都冇換」。個男嘅拎住袋吉野家外賣同大肚婆行去上海街小巴總站,佢哋一路跟一路報警。兩人上咗一架小巴,好彩差人及時嚟到叫返佢哋落車。
警方調查後,發現兩人原來係情侶,分別姓曾(45歲)及姓黎(35歲),佢哋涉嫌盜竊被捕。警方仲喺大肚婆身上搜到大約4克懷疑冰毒同少量懷疑白瓜子,佢另涉藏毒及管有第一部毒藥被捕。兩人已獲准保釋等候調查,下個月向警方報到。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載