› 選擇地區
三藩市
紐約
洛杉磯
其他美國地區
香港 台灣 北美
 
2018年08月08日

爆相爆片:九巴冷氣口封膠紙
乘客焗桑拿

大熱天時,前日仲有酷熱天氣警告,放工逼巴士冇位坐都唔緊要,但車廂一啲風都冇好似焗桑拿咁,都咪話唔辛苦!李先生前日傍晚6點幾放工,喺新蒲崗搭277P線返粉嶺,當時好多乘客,架車幾乎爆棚,佢上到車都要企喺近車頭位置,一上車已經覺得好焗,抬頭望吓發現頭頂有5個風口位都被黑色膠紙封住。

車長位疑似有冷氣

𠵱條線係特別班次,服務時間係逢星期一至五下晝5點半到夜晚7點,每半個鐘一班車,所以通常都好逼人,大家都表現得唔係幾舒服,有人用手上嘅報紙撥涼,有人開住手提風扇仔,李先生話車頭一滴風都冇,佢係咁標汗。
但車長似乎冇受影響,李先生話見到佢啲頭髮有風吹郁,估計車長位係有冷氣。其他乘客你眼望我眼,但係就冇人開聲問車長點解會咁焗。結果李先生捱咗45分鐘去到粉嶺落車。《蘋果》就呢件事問過九巴,九巴發言人話,經過檢查之後,證實有關巴士嘅空調系統運作良好。但係九巴會提醒車長喺開車之前,加強留意同檢查巴士上嘅設施係唔係一切正常。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載