› 選擇地區
三藩市
紐約
洛杉磯
其他美國地區
香港 台灣 北美
 
2018年08月07日

爆相爆片:赤腳女疑縱火 燒橋底木屋

深水埗通州街天橋底多年來成為露宿者嘅遮頭瓦,近年更出現一排排至少數十間用木搭建嘅構築物,有南亞裔人士盤踞,被形容為南亞人嘅村落及罪惡溫床,俾人印象烏煙瘴氣。噚日朝早上8點45分嗰度發生火警,讀者戴先生揸車經過,見到火光熊熊,消防員急步走去火場救火,戴先生話喺車入面都感受到熱力。
警方都接到好多人報案,差人到場發現天橋底通州街臨時街巿外面有6間木屋起火,大約10分鐘後消防員將火救熄。其間附近某啲道路要暫時封閉。火場受損面積8米乘20米,有一名44歲姓杜嘅越南籍女子冇着鞋匆匆忙忙喺火場走出嚟,差人上前截停佢查問。

去年已曾發生火災

差人喺嗰個女子身上搜到一個火機,經初步調查,懷疑同火警有關,相信起火原因有可疑;除此之外,差人又喺佢身上搜出一個唔屬於佢嘅手袋,於是以涉嫌縱火及盜竊拘捕嗰個女子,案件交由深水埗警區刑事調查隊跟進。
其實通州街天橋底已經唔係第一次起火,對上一次大火係舊年3月頭,當時露宿者嘅家當都俾火燒清光,但經調查就話冇可疑,係煮嘢食時失火引起。唔單止咁樣,之前警方曾經喺嗰度構築物撿獲武器同毒品。資料顯示,通州街臨時街市包括臨時街市同通州街公園之間嘅範圍,都屬於政府土地,由食環署負責管理。
警方喺構築物破案之後,今年5月,食環署同相關部門曾經採取聯合行動,拆除有關嘅非法構築物,清空構築物及附近雜物之後,以鐵絲網圍封該範圍,防止再有人搭建木屋。不過,問題似乎未解決,附近居民及商戶都擔心嗰度嘅衞生及治安問題,以及再有火警發生。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載