› 選擇地區
三藩市
紐約
洛杉磯
其他美國地區
香港 台灣 北美
 
2018年08月03日

爆相爆片:爆喉後梯變瀑布 師奶玩水自拍

酷熱天氣警告發出好幾日,市民都有唔同消暑活動,不過牛頭角樂華邨有位女士就有特別方法消暑。星期二晚10點左右喺樂華邨寧華樓11樓,一條大廈淡水喉懷疑用咗太多年終於抵受唔住壓力要爆,搞到大量淡水沿後樓梯湧落樓下。
讀者陳先生話,當日佢一上到樓就成地濕晒,於是沿住水流見到後樓梯「好似瀑布咁」,再望真啲發現一位年約40歲嘅女士坐喺後樓梯地下。陳先生話當時以為位女士跣低,仲諗緊點幫手,但即刻就聽到幾下笑聲,原來佢喺度玩緊水。只見嗰位女士身穿黑色中袖衫同黑色短褲,紮起頭髮滿面笑容,手拍拍水又企起身,走上幾級再坐低擺pose,之後仲用手機自拍,自得其樂。
不過,呢種方式似乎只有少數人欣賞,陳先生話佢同其他街坊隔住防煙門睇呢位女士玩水(圖),有人話唔明有乜咁開心。事關陳先生指因為爆水管關係,寧華樓2至11樓所有住戶都冇水用,佢自己到第二朝都要拎水桶落街攞水,雖然有啲唔方便,但佢讚房署快手,兩個鐘內已搵咗師傅維修。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載