› 選擇地區
三藩市
紐約
洛杉磯
其他美國地區
香港 台灣 北美
 
2018年07月27日

行行出八方:職安仙氣女︰地盤好有愛

建造業呢排最多人茶餘飯後談論嘅應該係有位充滿仙氣嘅少女,近幾個月喺地盤做實習,佢就係建造業議會刊物《建築人.建築事》呢期封面「地盤我至靚」嘅21歲氣質美女Wingbi!驟眼睇與政界女神游蕙禎有幾分相似嘅Wingbi係寶嘉建築嘅安全實習生,佢戴着頭盔,着晒地盤制服,甜美嘅笑容再配合埋心心手勢,成為一眾要喺炎熱高溫、日曬雨淋工作嘅地盤大佬嘅清泉。

以柔制剛 工友受落

今年21歲、喺理大讀緊環境及職業安全與健康課程3年級嘅Wingbi,留有一把柔順長髮兼擁有鋼琴演奏級,外表斯文,充滿仙氣,點睇都似坐喺寫字樓涼着冷氣舒舒服服工作,究竟有乜驅使佢選擇到地盤工作?答案原來係「愛」同埋「責任」。
Wingbi話呢幾個月喺地盤實習,令佢明白一位盡責嘅安全主任不但可保障師傅安全,仲係對佢哋家人嘅責任,呢個責任令佢認定將來畢業後要投身建造業,立志成為註冊安全主任。佢仲話原來地盤師傅好友善,閒時下午茶會一齊傾偈食嘢,同事爬高爬低,師傅會提醒大家要小心,佢大呼「地盤真係好有愛!」
喺一般人心目中,建築地盤係男人天下,點會有美少女肯做地盤?喺建築業界打滾多年嘅建造業總工會理事長周聯僑就話,呢個諗法已經OUT!佢話呢幾年大規模嘅承建商好似新鴻基,請咗唔少高學歷嘅高質靚女做建築地盤安全主任或助理安全督導員。點解女仔肯喺日曬雨淋嘅環境工作?周師傅話,其實安全主任人工一啲都唔差,大學畢業入行,一般先做助理安全督導員,人工有1.5萬元左右,做兩、三年升做安全主任,人工加至3萬元,再向上流升至安全經理,人工可以去到5萬元以上。
周師傅仲話,女仔喺地盤做有着數,「喺我哋三行始終比較重視同尊重女仔,喺女仔面前我哋唔夠膽講粗口,唔好睇我哋三行佬粗魯,我哋好錫女仔,危險粗重嘢唔會畀佢哋做,我夠膽講女仔喺地盤做嘢被尊重嘅程度高過寫字樓」。佢話,業界都好鼓勵請多啲大學生靚女做安全主任,因為可以柔制剛,「如果安全主任硬對硬,男人講男人,通常效果會比女人講男人低啲,如果一個靚女有學問又識安全,提點工友要留意,我哋都會受落啲。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載