› 選擇地區
三藩市
紐約
洛杉磯
其他美國地區
香港 台灣 北美
 
2018年07月23日

隔牆有耳:
華人民主書院晚宴 
鄭宇碩被嘲眼眉跳 - 李八方

近期頻頻受到攻擊嘅鄭宇碩,晚會上成為阿陶同仁哥開玩笑對象。王子俊攝

華人民主書院噚晚慶祝成立7周年兼舉行籌款晚會,唔少民主派人士,包括佔中發起人戴耀廷、工黨主席郭永健、前銅鑼灣書店店長林榮基等都畀面出席。最近先後被馮檢基同一名前助理攻擊嘅華人民主書院董事鄭宇碩,晚會上成為書院校長「阿陶」陶君行同書院董事「仁哥」何俊仁拎嚟開玩笑對象,仁哥笑鄭教授呢期好紅,應該成日都眼眉跳。

鄭教授聽到就苦笑話,自己只求心境平靜,自爆最近都冇睇啲親建制報章同前助理老屈佢本書,心情即時舒服番唔少。阿陶就搞笑話,唔少人喺前日民陣遊行,見到鄭宇碩個樣唔太開心,呼籲台下賓客要「撐吓教授先」,即時台下一陣掌聲。

拍賣「打破柏林圍牆」版畫

鄭教授話香港民族黨面臨被取締後,佢都擔心華人民主書院過幾年成為非法組織,第日聚埋一齊食飯或搞籌款都可能犯法,呼籲大家晚會上要把握機會嘞!
籌款晚會上除咗拍賣靚紅酒,亦有方蘇以「打破柏林圍牆」同「防火牆與異見者」為題嘅版畫,以及公民黨創黨黨魁余若薇以《自由花》歌詞同冰心家訓為題的書法作品。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載