› 選擇地區
三藩市
紐約
洛杉磯
其他美國地區
香港 台灣 北美
 
2018年07月18日

爆相爆片:人肉太陽擋 女司機單手揸小巴

貪靚女司機行高速公路時仲掛住拎紙皮防曬。

古語有云「一白遮三醜」,你睇全天候防曬美白產品長賣長有就知。屯門往來上水嘅綠van線44A有個貪靚女司機,每朝開工都全副武裝,太陽帽,有;黑超,有;防曬手袖,有;車窗簾,有!唔單止咁,佢行高速公路嗰陣仲要一隻手拎紙皮遮陽光,不過乘客見佢單手揸軚盤就認真心慌慌,「咁貪靚唔好做呢行啦,你孭住十幾條人命」。

遮左邊視線 乘客心慌慌

有巿民每朝都搭呢架小巴返工,佢話一次半次都算,但呢位女司機單手揸車嘅情況已經好幾次,搞到佢心慌慌。佢話高速公路車速限制行80,佢行81已經踩界,通常啲人上到車就瞓覺,揸車唔知幾時會有突發事,女司機左手拎紙皮遮陽光,擋住咗左邊視線,呢個動作維持一兩分鐘,萬一慢線有人cut佢,煞唔切車嘅話隨時有危險!
嗰個乘客仲話見過呢個女司機衝紅燈㖭,好彩冇引發交通意外,希望佢改善一下。有律師講過,駕駛者揸車時一定要雙手握軚,雖然香港冇法例講明單手揸車犯法,但如果因為咁樣令到自己或者其他道路使用者構成危險,都有機會觸犯不小心駕駛罪。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載