› 選擇地區
三藩市
紐約
洛杉磯
其他美國地區
香港 台灣 北美
 
2018年07月02日

爆相爆片:色狼影裙底斷正
偽求饒 偷刪相

雖然話「錯要認,打要企定」,但唔係做錯所有嘢,講一句sorry就可以算數㗎,好似呢隻喺港鐵偷影裙底嘅色狼,當場斷正,以為下跪求饒就可以過骨,最終都係俾阿Sir拉咗!

乘客制服 港鐵報警

話說6月27日(上周三)晚上7點幾放工繁忙時間,喺港島區返工嘅何先生,搭港鐵荃灣綫返屋企,當時列車企滿晒人,而去到金鐘站嗰陣,一位着粉紅色恤衫灰色西褲、揹住背囊嘅男子上車,列車開行冇耐,就有男乘客發現,呢位恤衫男用手機從後偷拍一名OL裙底,男乘客即時喝止,女事主先醒覺,幾名見義勇為男乘客合力制服隻色狼。
為免色狼逃走,熱心乘客即時按緊急掣通知車長,恤衫男當場斷正,初時佢仲死口唔認,有乘客㩒住色狼部手機,呢個時候,色狼竟然下跪求饒,「畀次機會吖」,但原來佢只係扮道歉,想趁人唔為意,偷偷哋刪除偷拍咗嘅裙底相,結果俾其他乘客即時阻止。由何先生提供嘅相片見到,隻色狼睇落去年約30幾歲,斯斯文文咁,估唔到「好眉好貌生沙蝨」。
港鐵職員接報之後上咗列車了解,女事主當然唔會放過佢,最終喺職員協助下同意報警,而阿Sir喺太子站等候,列車一到站就拉咗隻色狼喇。
警方發言人就話,當晚7點幾喺太子站,收到港鐵職員報案,指有乘客告知港鐵職員,有人喺港鐵列車上涉嫌偷拍女乘客。警方接報到場拘捕一名30歲譯音姓熊男子,指佢涉嫌「破壞公眾體統」,喺列車上以手機偷拍一名30歲女乘客嘅裙底,當時車上有乘客幫手制服疑犯,案件交由CID跟進。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載